ഇടുക്കി: കോണ്ഗ്രസ് നേതാവിനെ പോലീസ് ഒത്താശയോടെ കൊലക്കേസില് പ്രതിയാക്കിയ നടപടി തൊടുപുഴ സെഷന്സ് കോടതി പൊളിച്ചു. സിപിഎം പ്രാദേശിക നേതൃത്വത്തിന്റെ നിര്ദേശാനുസരണം രാഷ്ട്രീയ കേസില് പ്രതിയാക്കാന് തിരക്കഥ തയാറാക്കിയത് നെടുങ്കണ്ടം കസ്റ്റഡി കൊലപാതകത്തെ തുടര്ന്ന് സ്ഥലം മാറ്റിയ മുന് ഇടുക്കി എസ്പി കെ.ബി. വേണുഗോപാല്.
മന്ത്രി എം.എം. മണിയുടെ മണ്ഡലമായ ഉടുമ്പന്ചോല വിശ്വനാഥന് കോളനിയില് സെല്വരാജിന്റെ (60) മരിച്ച കേസില് കോണ്ഗ്രസ് ഉടുമ്പന്ചോല ബ്ലോക്ക് ജനറല് സെക്രട്ടറി സിബി ക്ലാമറ്റത്തെ (തോമസ് ജോണ്-44) ആണ് പ്രതിയാക്കിയത്. പോലീസിന്റെ നടപടിക്കെതിരെ സിബി തൊടുപുഴ കോടതിയെ സമീപിച്ചു. സിബിയെ പ്രതിയാക്കാന് മതിയായ തെളിവുകള് പോലീസിന്റെ പക്കല് ഇല്ലെന്ന് കണ്ടെത്തിയ കോടതി, സിബിയെ അറസ്റ്റ് ചെയ്യുന്നത് തടയുകയായിരുന്നു.
കടം വാങ്ങിയ 200 രൂപയുടെ പേരില്, മേയ് 23ന്, ലോക്സഭ തെരഞ്ഞെടുപ്പ് ഫലം പുറത്ത് വന്ന ദിവസം ഉടുമ്പന്ചോലയില് വച്ച് സെല്വരാജും, ഉടുമ്പന്ചോല പൂക്കലാര് സ്വദേശി അരുള് ഗാന്ധി (56) യും രാത്രി 8.30ന് ഏറ്റുമുട്ടിയതാണ് പ്രശ്നങ്ങളുടെ തുടക്കം. കയ്യാങ്കളിയില് ഇരുവര്ക്കും പരുക്കേറ്റു. സെല്വരാജ് അബോധാവസ്ഥയിലായതോടെ മധുര രാജാജി മെഡിക്കല് കോളജിലെത്തിച്ചു. സെല്വരാജിന്റെ മരുമകന് ശിങ്കിലിയുടെ പരാതിയില് 27ന് അരുള് ഗാന്ധിയെ പ്രതിയാക്കി ഉടുമ്പന്ചോല പോലീസ് കേസെടുത്തു. അരുള് ഗാന്ധി മാത്രമായിരുന്നു കേസില് പ്രതി. പണത്തിന്റെ പേരിലുള്ള തര്ക്കമാണ് അക്രമത്തിന് പിന്നിലെന്നും എഫ്ഐആറില് രേഖപ്പെടുത്തി.
കഴിഞ്ഞ മാസം 1ന് രാത്രി 8.15ന് ചികിത്സയിലിരിക്കെ സെല്വരാജ് മരിച്ചു. വിവരം പുറത്ത് വന്ന് മണിക്കൂറുകള്ക്കുള്ളില്, സിപിഎം സംസ്ഥാന സെക്രട്ടറി കോടിയേരി ബാലകൃഷ്ണന് തന്നെ സെല്വരാജിനെ രക്തസാക്ഷിയായി പ്രഖ്യാപിച്ചു. സെല്വരാജ് മരിച്ചതോടെ, കേസില് സിബിയെ പ്രതിയാക്കണമെന്ന രാഷ്ട്രീയ സമ്മര്ദവും പോലീസിന് മേല് ഉണ്ടായി.
തിരക്കഥ ഞെട്ടിക്കുന്നത്
സിബിയെ പ്രതിപ്പട്ടികയില് ഉള്പ്പെടുത്തണമെന്ന് മുന് എസ്പി കെ.ബി. വേണുഗോപാല്, ഉടുമ്പന്ചോല സിഐയോട് ആവശ്യപ്പെട്ടെങ്കിലും സിഐ വഴങ്ങിയില്ല. തുടര്ന്ന് കഴിഞ്ഞ മാസം രണ്ടിന് വൈകിട്ട് വേണുഗോപാല് ഉടുമ്പന്ചോല സ്റ്റേഷനിലെത്തി. ഇതിന്റെ ദൃശ്യങ്ങള് സ്റ്റേഷനിലെ സിസിടിവിയിലുണ്ട്. സിബിയുടെ നിര്ദേശ പ്രകാരമാണ് അരുള് ഗാന്ധി, സെല്വരാജിനെ കൊലപ്പെടുത്തിയതെന്നും മൊഴിയുണ്ടാക്കി, സിബിയെ 3-ാം പ്രതിയാക്കി. സെല്വരാജിനെ സംഘം ചേര്ന്ന് ആക്രമിച്ചുവെന്ന് വരുത്താന് അരുള് ഗാന്ധിയുടെ മകന് ചിമ്പുവിനെയും കേസില് 2-ാം പ്രതിയാക്കി.
രക്തസാക്ഷിയെ സൃഷ്ടിച്ചു
സെല്വരാജിനെ ആക്രമിച്ചത് കോണ്ഗ്രസുകാരനായ അരുള് ഗാന്ധി ആണെന്ന് ആരോപിച്ച് സിപിഎം പ്രാദേശിക നേതൃത്വവും ഇതിനിടെ രംഗത്തെത്തി. സെല്വരാജിന്റെ മൃതദേഹം പൊതുദര്ശനത്തിന് വച്ച്, വിലാപയാത്രയും നടത്തി. സിപിഎം പ്രാദേശിക നേതൃത്വം രക്തസാക്ഷിത്വം സ്ഥാപിച്ചെടുത്തു. മധുരയില് ചികിത്സയിലിരിക്കെ, സെല്വരാജിന് ബോധം തെളിഞ്ഞപ്പോള്, സിബിയുടെ നേതൃത്വത്തിലുള്ള സംഘമാണ് തന്നെ ആക്രമിച്ചതെന്ന് പറഞ്ഞതായി സെല്വരാജിന്റെ മരുമകന് ശിങ്കിലി പൊലീസിന് മൊഴി നല്കി. ഇതിന്റെ അടിസ്ഥാനത്തിലാണ് സിബിയെ ഉടുമ്പന്ചോല പോലീസ് കേസില് 3-ാം പ്രതിയാക്കിയത്. എന്നാല്, പരുക്കേറ്റതു മുതല് സെല്വരാജ് അബോധാവസ്ഥയിലായിരുന്നുവെന്നാണു രാജാജി മെഡിക്കല് കോളജിലെ ഡോക്ടര്മാരുടെ റിപ്പോര്ട്ട്.
