മലപ്പുറം : കോഴിക്കോട് കൊടിയത്തൂരില് ചെങ്കല് ക്വാറിയില് മണ്ണിടിഞ്ഞുവീണ് രണ്ട് തൊഴിലാളികള് മരിച്ചു. രാവിലെ ഒമ്പത് മണിയോടെയാണ് ചെറുവാടി പഴംപറമ്പിലെ ചെങ്കല് ക്വാറിയില് അപകടമുണ്ടായത്. കല്ല് വെട്ടുന്നതിനിടെ കൂട്ടിയിട്ട മണ്കൂനയില് നിന്ന് തൊഴിലാളികളുടെ മുകളിലേക്ക് മണ്ണിടിഞ്ഞ് വീഴുകയായിരുന്നു.
മലപ്പുറം ഓമാനൂര് സ്വദേശി വിനു, ചെറുവാടി സ്വദേശി പുല്പ്പറമ്പില് അബ്ദുല് റഹ്മാന് എന്നിവരാണ് മരിച്ചത്. തൊഴിലാളികള് വിവരമറിയിച്ചതിനെത്തുടര്ന്ന് നാട്ടുകാരും ഫയര്ഫോഴ്സും ചേര്ന്നാണ് അപകടത്തില് പെട്ടവരെ പുറത്തെടുത്തത്.
പുല്പ്പറമ്പില് അബ്ദുള് സലാമിന്റെ ഉടമസ്ഥതയിലുളളതാണ് ക്വാറി. പത്തു വര്ഷത്തോളമായി പ്രവര്ത്തിക്കുന്ന ക്വാറിയില് മണ്ണിടിച്ചില് ഉണ്ടായതിനെത്തുടര്ന്ന് സ്റ്റോപ് മെമോ നല്കിയിരുന്നതായി താമരശേരി തഹസില്ദാര് അറിയിച്ചു.
അനുമതിയില്ലാതെയാണ് ക്വാറി പ്രവര്ത്തിച്ചതെന്നും മണ്ണെടുക്കരുതെന്ന് നിര്ദ്ദേശിച്ചിരുന്നതായും അദ്ദേഹം പറഞ്ഞു. പ്രദേശത്തെ അനധികൃത ഖനനത്തെക്കുറിച്ച് പരിശോധന നടത്തുമെന്ന് റവന്യൂ വകുപ്പ് അറിയിച്ചു.
