ന്യൂദല്ഹി: കടുത്ത ചൂടില് ഉത്തരേന്ത്യ വെന്തുരുകുന്നു. ഇനിയുള്ള ദിവസങ്ങളില് ഉഷ്ണ തരംഗത്തിന്റെ തീവ്രത വര്ധിക്കാന് ഇടയുണ്ടെന്നാണ് കാലാവസ്ഥാ മുന്നറിയിപ്പ്. രാജസ്ഥാനിലെ ചാരുവില് അമ്പതു ഡിഗ്രിയില് ഏറെയാണ് ചൂട്. മണ്സൂണ് വൈകിയേക്കുമെന്ന സൂചന ആപത്കരമായ അവസ്ഥയാണ് സൃഷ്ടിക്കുക. വിവിധ സംസ്ഥാനങ്ങളില് റെഡ് അലര്ട്ട് മുന്നറിയിപ്പു നല്കി. ജനങ്ങള് സ്വീകരിക്കേണ്ട മുന് കരുതലുകളെക്കുറിച്ച് ആവര്ത്തിച്ച് അറിയിപ്പു നല്കുന്നുണ്ടെന്നും അധികൃതര് പറഞ്ഞു.
രാജ്യതലസ്ഥാനത്ത് 46.8 ഡിഗ്രിയാണ് ചൂട്. കുറഞ്ഞ താപനില 29 ഡിഗ്രി. ഉത്തരേന്ത്യയുടെ വിവിധ പ്രദേശങ്ങളില് ഉഷ്ണതരംഗം വീശുന്നുണ്ട്. ഒറ്റപ്പെട്ട പ്രദേശങ്ങളിലാണ് ഇത് ഇപ്പോള് തീവ്രം. എന്നാല് ഇനിയുള്ള ദിവസങ്ങളില് ഉഷ്ണതരംഗത്തിന്റെ തീവ്രത കൂടിയേക്കാമെന്നാണ് കാലാവസ്ഥാ കേന്ദ്രത്തിന്റെ മുന്നറിയിപ്പ്. ചൊവ്വാഴ്ച വരെ ഇത് തുടര്ന്നേക്കാം.
രാജ്യത്താകെ മണ്സൂണിന്റെ തുടക്കം ഇത്തവണ ദുര്ബലമാകുമെന്നാണ് കരുതുന്നത്. ഉത്തരേന്ത്യയില് മഴ കിട്ടാന് ഈ മാസം പകുതി വരെ കാത്തിരിക്കേണ്ടി വരും. ഉഷ്ണതരംഗംത്തിന്റെ ഇപ്പോഴത്തെ ദിശ രണ്ടു ദിവസത്തിനകം മാറിയേക്കാം. ഉത്തര്പ്രദേശ് കേന്ദ്രമാക്കിയാണ് ഇപ്പോഴുള്ളത്. വരും ദിവസങ്ങളില് ദല്ഹിയില് കനത്ത പൊടിക്കാറ്റിന് സാധ്യതയുണ്ടെന്നും മുന്നറിയിപ്പില് പറയുന്നു.
പഞ്ചാബ്, ഹരിയാന, ചണ്ഡീഗഡ്, ദല്ഹി, ഉത്തര്പ്രദേശ്, രാജസ്ഥാന്റെ ചില ഭാഗങ്ങള്, വിദര്ഭ എന്നിവിടങ്ങളിലാണ് ഇപ്പോള് റെഡ് അലര്ട്ട് പ്രഖ്യാപിച്ചിരിക്കുന്നത്.
