ന്യുദല്ഹി: പ്രധാന് മന്ത്രി കിസാന് സമ്മാന് നിധിയുടെ ആനുകൂല്യം ഇനി രാജ്യത്തെ എല്ലാ കര്ഷകര്ക്കും കിട്ടും. പ്രതിവര്ഷം ഇനി രാജ്യത്തെ എല്ലാ കര്ഷകര്ക്കും 6000 രൂപ ധനസഹായം നല്കാനാണ് പ്രധാനമന്ത്രിയുടെ അധ്യക്ഷതയില് ചേര്ന്ന ആദ്യമന്ത്രിസഭാ യോഗം തീരുമാനിച്ചത്. കര്ഷകര്ക്ക് പ്രഥമപരിഗണന നല്കുന്ന സര്ക്കാരാകും നരേന്ദ്രമോദിയുടേതെന്ന് മന്ത്രിസഭാ യോഗതീരുമാനങ്ങള് വിശദീകരിക്കാന് വിളിച്ച വാര്ത്താ സമ്മേളനത്തില് കൃഷിമന്ത്രി നരേന്ദ്രസിംഗ് തോമര് വ്യക്തമാക്കി.
2 ഹെക്ടര് വരെ ഭൂമിയുള്ള എല്ലാ കര്ഷകര്ക്കും പ്രതിവര്ഷം 6000 രൂപ വീതം നല്കുമെന്നാണ് ഇടക്കാല ബജറ്റില് നേരത്തേ കേന്ദ്രസര്ക്കാര് പ്രഖ്യാപിച്ചിരുന്നത്. ആദ്യത്തെ ഗഡു എല്ലാ കര്ഷകര്ക്കും ബാങ്ക് അക്കൗണ്ടില് നേരിട്ട് നല്കുകയും ചെയ്തു. ഈ പദ്ധതി ഭൂരഹിതരായ കര്ഷകരുള്പ്പടെ എല്ലാവരിലേക്കും വ്യാപിപ്പിക്കുമ്പോള് ജനപ്രിയ പദ്ധതികളിലൂന്നിയാകും രണ്ടാം മോദി സര്ക്കാര് മുന്നോട്ടുപോവുക എന്ന വ്യക്തമായ സൂചനകളാണ് ലഭിക്കുന്നത്.
”പ്രധാനമന്ത്രി കാര്ഷികരംഗത്തിന് കൃത്യമായ ഊന്നല് നല്കുന്നുണ്ട്. 2022-ഓടെ കര്ഷകരുടെ വരുമാനം ഇരട്ടിയാക്കുമെന്ന വാഗ്ദാനത്തിനായി പ്രവര്ത്തിക്കും. കര്ഷകരുടെ ക്ഷേമത്തിനായി നിരവധി പദ്ധതികള് ഞങ്ങള് നടപ്പാക്കി. കര്ഷകര്ക്ക് കൃത്യമായ വരുമാനം ഉറപ്പാക്കണമെന്ന ലക്ഷ്യത്തോടെയാണ് പിഎം കിസാന് സമ്മാന് നിധി അവതരിപ്പിച്ചത്.
ഇതിന് അര്ഹരായ കര്ഷകരുടെ പട്ടിക പല സംസ്ഥാനങ്ങളും നല്കിയില്ല. പക്ഷേ, മൂന്ന് കോടിയിലധികം കര്ഷകര്ക്ക് ഇതുവരെ ഈ സഹായം എത്തിക്കാന് കഴിഞ്ഞിട്ടുണ്ട്. എല്ലാ കര്ഷകര്ക്കും ഈ സഹായം എത്തണമെന്നതാണ് ഈ സര്ക്കാരിന്റെ ലക്ഷ്യം. അതിനാല് ഇനി എല്ലാ കര്ഷകര്ക്കും ഈ സഹായം നല്കാന് തീരുമാനിച്ചിട്ടുണ്ട്”, നരേന്ദ്ര സിംഗ് തോമര് പറഞ്ഞു.
പ്രധാന്മന്ത്രി കിസാന് പെന്ഷന് യോജനയും വിപുലപ്പെടുത്താന് തീരുമാനിച്ചിട്ടുണ്ട്. 40 വയസ്സിന് മുകളില് പ്രായമുള്ള എല്ലാ കര്ഷകര്ക്കും പ്രതിമാസം 3000 രൂപ നല്കുന്നതാണ് പ്രധാന്മന്ത്രി കിസാന് പെന്ഷന് യോജന. ഇതിലൂടെ അഞ്ച് കോടി കര്ഷകര്ക്ക് പെന്ഷന് ആനുകൂല്യം ലഭിക്കുമെന്ന് നരേന്ദ്രസിംഗ് തോമര് പറഞ്ഞു.
പദ്ധതി വിപുലപ്പെടുത്തുന്നതിലൂടെ ഖജനാവിന് 12,500 കോടി രൂപ കൂടി ചെലവാകും. പദ്ധതിയിലൂടെ പ്രതിവര്ഷം 87,000 കോടി രൂപയാണ് ആകെ ചെലവെന്നും കണക്കുകൂട്ടപ്പെടുന്നു
