ന്യൂദല്ഹി: എന്ഡിഎയുടെ തെരഞ്ഞെടുപ്പു വിജയത്തിന്റെ ആഘോഷത്തില് രാജ്യം മുഴുകിയപ്പോഴും പതിവുപോലെ തിരക്കിട്ട ദിവസങ്ങളിലൂടെയാണ് പ്രധാനമന്ത്രി നരേന്ദ്ര മോദി കടന്നു പോയത്. വ്യാഴാഴ്ച സത്യപ്രതിജ്ഞക്കു തൊട്ടു പിന്നാലെ രാത്രി തന്നെ കിര്ഗിസ്ഥാന് പ്രതിനിധി സംഘവുമായി പ്രധാനമന്ത്രി കൂടിക്കാഴ്ച നടത്തി. സത്യപ്രതിജ്ഞ ചടങ്ങില് പങ്കെടുക്കാനെത്തിയ കിര്ഗിസ്ഥാന് പ്രസിഡന്റ് സൂറോന്ബെ ജീന്വെക്കോവുമായി മോദി ചര്ച്ച നടത്തി. സത്യപ്രതിജ്ഞയ്ക്കു ശേഷമുള്ള മോദിയുടെ ആദ്യത്തെ പ്രധാനപ്പെട്ട ഔദ്യോഗിക പരിപാടിയും ഈ കൂടിക്കാഴ്ചയായിരുന്നു.
രാവിലെ മുതല് മന്ത്രിമാരുടെ വകുപ്പു വിഭജനം സംബന്ധിച്ചുള്ള വ്യത്യസ്ത റിപ്പോര്ട്ടുകള് പുറത്തു വരുന്നതിനിടെയും തിരക്കിട്ട നിമിഷങ്ങളിലൂടെയാണ് മോദി കടന്നു പോയത്. സത്യപ്രതിജ്ഞാ ചടങ്ങളില് അതിഥികളായി പങ്കെടുത്ത രാഷ്ട്രത്തലവന്മാരുമായുള്ള ചര്ച്ചകളായിരുന്നു പ്രധാനം.
ശ്രീലങ്കന് പ്രസിഡന്റ് എം. സിരിസേനയുമായും ഭൂട്ടാന് പ്രധാനമന്ത്രി ലോതായി ഷെറിങ്ങുമായും ബെഗ്ലാദേശ് പ്രസിഡന്റ് മുഹമ്മദ് അബ്ദുള് ഹമീദുമായും ഹൈദരാബാദ് ഹൗസില് വെച്ചായിരുന്നു കൂടിക്കാഴ്ച. നേപ്പാള് പ്രധാനമന്ത്രി കെ.പി. ശര്മ ഒലിയുമായും മൗറീഷ്യസ് പ്രധാനമന്ത്രി പ്രവിന്ദ് ജഗ്നാഥുമായും മോദി ചര്ച്ച നടത്തി. സത്യപ്രതിജ്ഞാ ചടങ്ങില് പങ്കെടുക്കാനെത്തിയതിന് എല്ലാ രാഷ്ട്രത്തിലവന്മാരേയും മോദി നന്ദി അറിയിച്ചു.
