കൊച്ചി: ഓണ്ലൈന് ഭക്ഷണവിതരണത്തിന്റെ മറവില് മയക്കുമരുന്ന് വില്പ്പന വ്യാപകമാകുന്നതായി എക്സൈസ് ഉദ്യാഗസ്ഥര് പറഞ്ഞു. കൊച്ചിയില് അടുത്തിടെ ഇത്തരത്തിലുള്ള മൂന്നു കേസുകള് പിടികൂടി.
വൈപ്പിന്- കാളമുക്ക് ഭാഗത്ത് വാഹന പരിശോധയില് ബൈക്കില് വന്ന യുവാവ് ഭക്ഷണ വിതരണ ബാഗ് വലിച്ചെറിഞ്ഞ് രക്ഷപ്പെട്ടു. ബാഗ് പരിശോധിച്ചപ്പോള് കഞ്ചാവ് കണ്ടെത്തി. എക്സൈസ് ഇന്റലിജന്സ് നടത്തിയ അന്വേഷണത്തില് പെരിന്തല്മണ്ണ സ്വദേശി നികേഷിനെ (27) 320 ഗ്രാം ഹാഷിഷുമായി ഫോര്ട്ടുകൊച്ചി ഭാഗത്തു നിന്ന് പിടികൂടി.
നഗരത്തില് ചരസ്, എംഡിഎംഎ, കഞ്ചാവ് എന്നിവ വിതരണം ചെയ്തതിന് കോഴിക്കോട് സ്വദേശികളായ മൂന്നു യുവാക്കളെ എക്സൈസ് സംഘം പിടികൂടിയിരുന്നു. കമ്പനി സെക്രട്ടറിഷിപ്പ് കോഴ്സിന് പഠിച്ചിരുന്ന ഇവര് തമ്മനത്ത് വീട് വാടകയ്ക്ക് എടുത്താണ് താമസിച്ചിരുന്നത്. പാര്ട്ട് ടൈമായി ഓണ്ലൈന് ഭക്ഷണവിതരണ കമ്പനിയിലും ഇവര് ജോലി ചെയ്തിരുന്നു. ഇതിന്റെ മറവിലായിരുന്നു മയക്കുമരുന്ന് വില്പ്പന.
ഇവരുടെ താമസസ്ഥലത്തു നിന്ന് 95 ഗ്രാം ചരസ്, ആറു ഗ്രാം എംഡിഎഎ, 1.850 കിലോ കഞ്ചാവ് എന്നിവ കണ്ടെടുത്തു. ഓണ്ലൈന് ഭക്ഷണവിതരണത്തിന് നിയമിക്കപ്പെടുന്നവരുടെ ക്രിമിനല് പശ്ചാത്തലം പരിശോധിക്കാത്തതാണ് ഇത്തരത്തില് കുറ്റവാളികള് കടന്നുകൂടാന് കാരണമെന്നും തുടര്ന്ന് ഇവരെ കര്ശന പരിശോധനയ്ക്ക് വിധേയമാക്കുമെന്നും എക്സൈസ് അറിയിച്ചു.
