ന്യൂദല്ഹി: അഴിമതിക്കേസില് മുന് ഹരിയാന മുഖ്യമന്ത്രി ഓം പ്രകാശ് ചൗത്താലയുടെ രണ്ട് കോടി രൂപയുടെ സ്വത്തുക്കള് എന്ഫോഴ്സ്മെന്റ് ഡയറക്ടറേറ്റ് കണ്ടുകെട്ടി. ദല്ഹിയിലെ അദ്ദേഹത്തിന്റെ ഫാംഹൗസും ഭൂമിയുമാണ് പിടിച്ചെടുത്തത്. കള്ളപ്പണ നിരോധന നിയമപ്രകാരമായിരുന്നു നടപടി.
അനധികൃത സ്വത്ത് സമ്പാദനക്കേസില് ചൗത്താലക്കും കൂട്ടാളികള്ക്കുമെതിരെ സിബിഐ കേസെടുത്ത് അന്വേഷണമാരംഭിക്കുകയായിരുന്നു. ഓം പ്രകാശ് ചൗത്താല, അഭയ് ചൗത്താല, അജയ് ചൗത്താല തുടങ്ങിയവര്ക്കെതിരെ 1998 മുതല് സിബിഐ കേസ് നിലവിലുണ്ടായിരുന്നു.
വെളിപ്പെടുത്താത്ത സ്രോതസ്സില് നിന്നുള്ള പണമുപയോഗിച്ച് ഇവര് ദല്ഹിയില് ധാരാളം സ്ഥാവര വസ്തുക്കള് വാങ്ങിക്കൂട്ടിയിരുന്നു. ഹരിയാനയിലെ സിര്സയില് അദ്ദേഹം ഒരു വീടും പണികഴിപ്പിച്ചിരുന്നു.
ചൗത്താല വ്യാപകമായ തോതില് കള്ളപ്പണം വെളുപ്പിച്ചതായും സിബിഐ കണ്ടെത്തിയിരുന്നു. 2005ലെയും 2009ലെയും തെരഞ്ഞെടുപ്പുകളില് നല്കിയ സത്യവാങ്മൂലങ്ങളിലെ പൊരുത്തക്കേടുകളും അന്വേഷിച്ചിരുന്നു.
നേരത്തെ ചൗത്താലയുടെ നാല്പ്പത്തിയേഴ് ലക്ഷം രൂപയുടെ വസ്തുവകകള് എന്ഫോഴ്സ്മെന്റ് പിടിച്ചെടുത്തിരുന്നു. ഏപ്രില് മാസത്തില് മൂന്ന് കോടി എഴുപത് ലക്ഷം രൂപയുടെ സ്വത്തുക്കളും ഇദ്ദേഹത്തില് നിന്ന് കണ്ടുകെട്ടിയിരുന്നു.
