ന്യൂദല്ഹി: കോണ്ഗ്രസിന് പ്രധാനമന്ത്രി സ്ഥാനം വേണമെന്ന പിടിവാശിയില്ലെന്ന പ്രസ്താവനയില് നിന്ന് ഗുലാം നബി ആസാദ് മലക്കം മറിഞ്ഞത് കോണ്ഗ്രസ് ആശങ്ക വെളിവാക്കി. കോണ്ഗ്രസിന് ഭരണത്തിലെത്താന് സാധിക്കില്ലെന്ന് വ്യക്തമായതോടെയാണ് രാജ്യസഭാ എംപിയും മുതിര്ന്ന നേതാവുമായ ആസാദ് രാഹുല് ഗാന്ധിയെ പരോക്ഷമായി തള്ളിപ്പറഞ്ഞ് പ്രസ്താവന നടത്തിയത്.
എന്നാല് അവസാന ഘട്ട വോട്ടെടുപ്പ് നടക്കാനിരിക്കെ പരാജയം തുറന്നുസമ്മതിച്ചത് തിരിച്ചടിയാകുമെന്ന വിമര്ശനം പാര്ട്ടിയില് ഒരു വിഭാഗം ഉയര്ത്തി.
രാഹുലിനെ ഭാവി പ്രധാനമന്ത്രിയായി ഉയര്ത്തിക്കാട്ടി തെരഞ്ഞെടുപ്പിനെ നേരിടുമ്പോഴുണ്ടായ പ്രസ്താവന പാര്ട്ടിക്ക് നാണക്കേടാവുകയും ചെയ്തു. ഇതോടെയാണ് തിരുത്തുമായി ആസാദ് രംഗത്തുവന്നത്.
യുപിഎക്ക് പുറത്തുള്ള പ്രാദേശിക കക്ഷികളുടെ പിന്തുണയോടെ മോദി വീണ്ടും പ്രധാനമന്ത്രിയാകുന്നത് തടയാനാകുമോയെന്നാണ് കോണ്ഗ്രസ് ശ്രമിക്കുന്നത്. വീണ്ടും അഞ്ച് വര്ഷം കൂടി മോദി ഭരിച്ചാല് രാഷ്ട്രീയമായി തങ്ങള് തുടച്ചുനീക്കപ്പെടുമെന്നാണ് കോണ്ഗ്രസ് നേതാക്കളുടെ ആശങ്ക. രാഹുല് ഗാന്ധിയെ യുപിഎ കക്ഷികള് തന്നെ അംഗീകരിക്കാത്ത സാഹചര്യത്തിലാണ് പാര്ട്ടിക്കുള്ളിലെ ഒരു വിഭാഗം നേതാക്കളുടെ അഭിപ്രായം ആസാദ് തുറന്നുപ്രകടിപ്പിച്ചത്.
എന്സിപി നേതാവ് ശരത് പവാറിനെപ്പോലുള്ളവര് മമത ബാനര്ജിയെയും മായാവതിയെയുമാണ് പിന്തുണക്കുന്നത്.
