ന്യൂദല്ഹി: ഫ്ളാറ്റുകളും വീടുകളും പറഞ്ഞ സമയം കഴിഞ്ഞ് ഒരു വര്ഷമായിട്ടും ലഭിച്ചില്ലെങ്കില് നിര്മാതാക്കളോട് ഉടമകള്ക്ക് പലിശസഹിതം പണം മടക്കി ചോദിക്കാമെന്ന് ദേശീയ ഉപഭോക്തൃ തര്ക്ക പരിഹാര കമ്മീഷന്( എന്സിഡിആര്സി) ഉത്തരവിട്ടു. പണമടച്ച് വര്ഷങ്ങള് കഴിഞ്ഞിട്ടും വീടു ലഭിക്കാതെ വലയുന്ന ലക്ഷക്കണക്കിനാള്ക്കാര്ക്ക് ആശ്വാസമാകുന്നതാണീ ഉത്തരവ്. ഇങ്ങനെ പണം മടക്കി ചോദിക്കാന് വീടു വാങ്ങുന്നവര്ക്ക് അവകാശമുണ്ട്. കോടതി വ്യക്തമാക്കി. വര്ഷങ്ങള് കാത്തിരുന്നിട്ടും വീട് ലഭിക്കാതെ വന്ന ശലഭ് നിഗം നല്കിയ ഹര്ജിയിലാണ് ഉത്തരവ്.
ഒരു കോടിയുടെ വീടിന് 2012ല് ശലഭ് 90 ലക്ഷവും നല്കി. 36 മാസത്തിനുള്ളില് ഫ്ളാറ്റ് കൈമാറുെമന്നാണ് ഓറീസ് ഇന്ഫ്രാസ്ട്രക്ച്ചര് കമ്പനി ഉറപ്പു നല്കിയിരുന്നത്. എന്തെങ്കിലും അവിചാരിത കാരണത്താല് വൈകിയാല് ആറു മാസം കൂടി അധികം നല്കാമെന്നും വ്യവസ്ഥയുണ്ടായിരുന്നു. അങ്ങനെ 42 മാസം. സമയം കഴിഞ്ഞ് വര്ഷങ്ങള് പിന്നിട്ടിട്ടും വീട് ലഭിച്ചില്ല. തുടര്ന്നാണ് അവര് കമ്മീഷനെ സമീപിച്ചത്. തനിക്ക് പണം വേണ്ട വീടുമതിയെന്ന് അവര് പറഞ്ഞതു പ്രകാരം പണി പൂര്ണമായും തീര്ത്ത് വാസയോഗ്യമാക്കി ഈ സപ്തംബറിനകം ശലഭിന് വീട് നല്കാനും കമ്മീഷന് ഉത്തരവിട്ടു. 90 ലക്ഷം രൂപയ്ക്ക് വര്ഷം ആറു ശതമാനം പലിശ വീതം വൈകിയ ഓരോ വര്ഷത്തിനും നഷ്ടപരിഹാരം നല്കാനും കമ്മീഷന് നിര്ദ്ദേശിച്ചു. സപ്തംബറിനകം നല്കിയില്ലെങ്കില് മുഴുവന് തുകയും പത്തു ശതമാനം പലിശ സഹിതം മടക്കി നല്കണം.
