കൊച്ചി: കൊച്ചി മെട്രോ ഒന്നാംഘട്ടത്തിന്റെ തുടര്ച്ചയായ, പേട്ട- എസ്എന് ജങ്ഷന് പാതയ്ക്കുള്ള സ്ഥലമെടുക്കല് മെയ് 31 ന് മുമ്പ് സ്ഥലമെടുപ്പ് പൂര്ത്തിയാക്കും. സര്ക്കാര് അംഗീകൃത പാക്കേജ് സ്ഥലമുടമകള് സമ്മതിച്ചതോടെ മെയ് 31ന് മുമ്പായി മുഴുവന് സ്ഥലവും ഏറ്റെടുത്തു നല്കാമെന്നു കളക്ടര് കെഎംആര്എല്ലിനെ അറിയിച്ചു.
മെട്രോ സ്റ്റേഷനുകള്ക്കുള്ള രണ്ടേക്കര് ഉള്പ്പടെ 4.75 ഏക്കര് സ്ഥലമാണ് എടുക്കേണ്ടത്. സ്ഥലം കിട്ടിയാലുടന് നിര്മാണം തുടങ്ങുമെന്ന് കെഎംആര്എല് എംഡി: എ.പി.എം. മുഹമ്മദ് ഹനീഷ് പറഞ്ഞു.
ആദ്യമായി കെഎംആര്എല് നേരിട്ട് നിര്മാണം നടത്തുന്നു എന്ന പ്രത്യേകയാണ് ഒന്നാംഘട്ടത്തിന്റെ തുടര്ച്ചയായ പേട്ട-എസ്എന് ജങ്ഷന് മെട്രോ പാതയ്ക്കുള്ളത്. 1.2 കിലോമീറ്റര് പാതയില് രണ്ട് സ്റ്റേഷനുകളുമുണ്ട്. പാണംകുട്ടി പുഴയ്ക്കുമേലെയുള്ള പാലവും പുനര്നിര്മിക്കും. സ്റ്റേഷനുകളുടെയും പാലത്തിന്റെയും ടെന്ഡറുകള് 27ന് ഓപ്പണ് ചെയ്യുമെന്നും എംഡി അറിയിച്ചു.
ഫെബ്രുവരിയോടെ സ്ഥലമേറ്റെടുക്കല് പൂര്ത്തിയാക്കുമെന്നായിരുന്നു റവന്യൂ വകുപ്പ് നേരത്തെ പറഞ്ഞത്. എന്നാല്, നഷ്ടപരിഹാര പാക്കേജുമായി ബന്ധപ്പെട്ട് സ്ഥലം ഉടമകളുമായി ധാരണ വൈകിയത് താമസത്തിനിടയാക്കി. ആദ്യ അലൈന്മെന്റിന് മാറ്റം വരുത്തി, പുതിയ അലൈന്മെന്റ് തയാറാക്കേണ്ടി വന്നതും പദ്ധതി വൈകാന് കാരണമായി.
വാതക പൈപ്പ് ലൈന് കടന്നുപോകുന്ന സ്ഥലത്തിലൂടെയായിരുന്നു ആദ്യ അലൈന്മെന്റ്. പിന്നീട് മൂന്ന് മീറ്ററോളം മാറ്റി പുതിയ അലൈന്മെന്റ് തയാറാക്കേണ്ടി വന്നു. സര്ക്കാര് അംഗീകാരത്തിന് വീണ്ടും മാസങ്ങളെടുത്തു. ഇത്തരം സാങ്കേതിക തടസങ്ങള് മാറ്റി വന്നതിനിടെയാണ് സ്ഥലമേറ്റെടുക്കലുമായി ബന്ധപ്പെട്ടു തടസങ്ങള് നേരിട്ടത്.
വടക്കേക്കോട്ട, എസ്എന് പുരം എന്നീ രണ്ട് സ്റ്റേഷനുകള് ഉള്പ്പട്ട പാതയില് കടകളും വീടുകളും ഉള്പ്പെട്ട സ്ഥലങ്ങളാണ് ഏറ്റെടുക്കേണ്ടത്. നിലവിലെ സാഹചര്യത്തില് ജൂലൈയിലേ പൈലിങ് ജോലികള് തുടങ്ങാനാകൂ. പാണംകുടി പാലത്തിന്റെ പുനനിര്മാണം ഉള്പ്പടെ 356 കോടി രൂപയാണ് നിര്മാണ ചെലവ്. പദ്ധതി വൈകിയ സാഹചര്യത്തില് ചെലവില് മാറ്റം വന്നിട്ടുണ്ട്. പുതിയ എസ്റ്റിമേറ്റ് സര്ക്കാരിന്റെ അംഗീകാരത്തിനായി സമര്പ്പിച്ചു. ആദ്യ എസ്റ്റിമേറ്റ് പ്രകാരം 123 കോടിരൂപ സര്ക്കാര് നേരത്തെ അനുവദിച്ചതാണ്. ശേഷിക്കുന്ന പണം വിദേശ ധനകാര്യ ഏജന്സികളില് നിന്ന് വായ്പയെടുക്കും.
മെട്രോ സ്റ്റേഷനുകളുടെ നിര്മാണത്തിന് ഫ്രഞ്ച് ധനകാര്യ ഏജന്സിയായ എഎഫ്ഡി വാഗ്ദാനം ചെയ്ത 189 കോടിയില് നിന്നാകും വടക്കേക്കോട്ട, എസ്എന് ജങ്ഷന് സ്റ്റേഷനുകള് മോടിപിടിപ്പിക്കുന്നതിനുള്ള പണം കണ്ടെത്തുക.
പ്രതികരിക്കാൻ ഇവിടെ എഴുതുക: