വിശാഖപട്ടണം: ഐപിഎല്ലില് ഇന്ന് കലാശപോരാട്ടത്തിന് മുന്നോടിയായുള്ള സാമ്പിള് വെടിക്കെട്ട്. ക്വാളിഫയര് ഒന്നില് മുംബൈ ഇന്ത്യന്സിനോട് തോറ്റ ചെന്നൈ സൂപ്പര് കിങ്സ് യുവനിരയുടെ കരുത്തുമായെത്തുന്ന ദല്ഹി ക്യാപിറ്റല്സിനെ നേരിടും. വിശാഖപട്ടണത്ത് രാത്രി 7:30ന് കളി തുടങ്ങും. ചെന്നൈയുടെ പരിചയസമ്പത്തും ദല്ഹിയുടെ യുവത്വവും തമ്മിലുള്ള പോരാട്ടമാകും ഈ മത്സരം. ജയിക്കുന്ന ടീം ഫൈനലിലെത്തും.
ഐപിഎല്ലില് ആദ്യ ഫൈനല് ലക്ഷ്യമിട്ടാണ് ദല്ഹി കളിക്കളത്തിലിറങ്ങുക. എലിമിനേറ്ററില് സണ്റൈസേഴ്സ് ഹൈദരാബാദിനെ തോല്പ്പിച്ചതിന്റെ ആത്മവിശ്വാസത്തിലാണ് ദല്ഹി. വിശാഖപട്ടണത്ത് നടന്ന ഐപിഎല് മത്സരങ്ങളില് കൂടുതല് റണ്സ് നേടിയത് ദല്ഹി ഓപ്പണര് ശിഖര് ധവാനാണ്. 259 റണ്സോടെ മറ്റാരേക്കാലും മുന്നില്. ചെന്നൈക്കെതിരായ മത്സരത്തില് ധവാന് ഫോം തുടര്ന്നാല് ദല്ഹിക്ക് ഫൈനലിലെത്താം. ഫാസ്റ്റ് ബൗളര് ഇഷാന്ത് ശര്മ താളം കണ്ടെത്തിയതോടെ ബൗളിങ്ങ് നിരയും കരുത്താര്ജിച്ചുകഴിഞ്ഞു.
ദല്ഹിയുടെ യുവനിരയെ കീഴടക്കണമെങ്കില് ഇന്ന് ചെന്നൈ ബാറ്റ്സ്മാന്മാര്ക്ക് കളി മെച്ചപ്പെടുത്തിയേ മതിയാകൂ. തുടര്ച്ചയായി പരാജയപ്പെടുന്ന ഓപ്പണര്മാര് ഇന്ന് താളം കണ്ടെത്തണം. ഐപിഎല്ലിലേ എക്കാലത്തെയും മികച്ച റണ്വേട്ടക്കാരനായ സുരേഷ് റെയ്നയും പേരിനൊത്ത പ്രകടനം നടത്തിയാല് ചെന്നൈക്ക് വിജയിക്കാം.
സ്പിന്നര്മാരിലാണ് ചെന്നൈയുടെ പ്രതീക്ഷ. ഹര്ഭജന് സിങ്, രവീന്ദ്ര ജഡേജ, ഇംമ്രാന് താഹിര് എന്നിവര് ഭേദപ്പെട്ട രീതിയില് പന്തെറിയുന്നുണ്ട്. എന്നാല് വിശാഖപട്ടണത്തെ പിച്ചില് സ്പിന്നര്മാര്ക്ക് എത്രത്തോളം ആനുകൂല്യം ലഭിക്കുമെന്ന് കണ്ടറിയണം.
എലിമിനേറ്റര് മത്സരത്തില് സണ്റൈസേഴ്സ് ഹൈദരാബാദിനെതിരെ കഷ്ടിച്ച് രക്ഷപെടുകയായിരുന്നു ദല്ഹി. വിന്ഡീസ് താരം കീമോ പോളിന്റെ ബൗളിങ്ങും പൃഥ്വി ഷാ, ഋഷഭ് പന്ത് എന്നിവരുടെ ബാറ്റിങ്ങുമാണ് ദല്ഹിക്ക്് രണ്ട് വിക്കറ്റിന്റെ വിജയം സമ്മാനിച്ചത്. 163 റണ്സ് വിജയലക്ഷ്യം പിന്തുടര്ന്ന ദല്ഹിക്കായി ഓപ്പണര് പൃഥ്വി ഷാ അര്ധസെഞ്ചുറി നേടി മുന്നില് നിന്നു. ഷാ 38 പന്തില് രണ്ട് സിക്സും ആറ് ഫോറും അടക്കം 56 റണ്സ് നേടി. വെടിക്കെട്ട് ബാറ്റിങ്ങ് പുറത്തെടുത്ത ഋഷഭ് പന്ത് 21 പന്തില് അഞ്ച് ഫോറും രണ്ട് സിക്സും സഹിതം 49 റണ്സ് എടുത്തു.
