ചെന്നൈ: ഐപിഎല്ലില്‍ മുംബൈ ഇന്ത്യന്‍സ് തങ്ങളെ നിഷ്പ്രഭമാക്കിയെന്ന് ചെന്നൈ സൂപ്പര്‍ കിങ്‌സ് പരിശീലകന്‍ സ്റ്റീഫന്‍ ഫ്‌ളെമിങ്ങ്. ആദ്യ പ്ലേ ഓഫില്‍ മുംബൈ ഇന്ത്യന്‍സിനോട് ആറു വിക്കറ്റിന് തോറ്റതിനു പിന്നാലെയാണ് ചെന്നൈ പരിശീലകന്റെ പ്രതികരണം. സാഹചര്യങ്ങളോട് നന്നായി ഇണങ്ങാന്‍ മുംബൈക്കായി. ചെന്നൈക്കുവേണ്ടി ഒരുക്കിയ പിച്ചില്‍ ഞങ്ങളെക്കാള്‍ മികച്ചുനിന്നത് മുംബൈയാണെന്ന് സമ്മതിച്ച ഫ്‌ളെമിങ്ങ് അര്‍ഹിച്ച വിജയമാണ് മുംബൈ സ്വന്തമാക്കിയതെന്നും പ്രതികരിച്ചു.
കളിയുടെ എല്ലാ മേഖലയിലും മുംബൈ മികച്ചുനിന്നു. പലപ്പോഴും ഞങ്ങളെ സമ്മര്‍ദത്തിലാക്കാനും അവര്‍ക്കായി. അടുത്ത മത്സരത്തില്‍ മികച്ച തിരിച്ചുവരവാണ് ലക്ഷ്യമെന്നും അദ്ദേഹം പറഞ്ഞു. ആദ്യ പ്ലേ ഓഫില്‍ തോറ്റെങ്കിലും ഫൈനലിലെത്താന്‍ ചെന്നൈക്ക് ഇനിയും അവസരമുണ്ട്.
സൂര്യകുമാര്‍ യാദവിന്റെ അര്‍ധ സെഞ്ചുറിയിലാണ് മുംബൈ ചെന്നൈയെ തോല്‍പ്പിച്ചത്. 132 റണ്‍സിന്റെ വിജയലക്ഷ്യത്തിനായി ബാറ്റേന്തിയ മുംബൈ 18.3 ഓവറില്‍ നാലു വിക്കറ്റ നഷ്ടത്തില്‍ വിജയിച്ചുകയറി. സൂര്യകുമാര്‍ യാദവ് 54 പന്തില്‍ പത്തു ഫോറോടെ 71 റണ്‍സ് നേടി പുറത്താകാതെനിന്നു. 28 റണ്‍സ് നേടിയ ഇഷാന്‍ കിഷന്‍ യാദവിന് മികച്ച പിന്തുണ നല്‍കി. നായകന്‍ രോഹിത് ശര്‍മ നാല് റണ്‍സിനും ക്വിന്റണ്‍ ഡി കോക്ക് എട്ടു റണ്‍സിനും പുറത്തായി.ചെന്നൈക്കായി സ്പിന്നര്‍ ഇമ്രാന്‍ താഹിര്‍ രണ്ട് വിക്കറ്റ് വീഴ്‌ത്തി.
ബാറ്റിങ്ങ് തെരഞ്ഞെടുത്ത ചെന്നൈ തുടക്കംമുതലേ തകര്‍ച്ച നേരിട്ടു. ഓപ്പണര്‍മാരായ ഫാഫ് ഡു പ്ലെസിസ് (ആറ്), ഷെയ്ന്‍ വാട്‌സണ്‍ (10), സുരേഷ് റെയ്‌ന (അഞ്ച്) എന്നിവര്‍ തുടക്കത്തിലേ പുറത്തായി. മധ്യനിരയില്‍ മുരളി വിജയ്, അമ്പാട്ടി റായ്ഡു, നായകന്‍ എം.എസ്. ധോണി എന്നിവര്‍ പിടിച്ചുനിന്നതോടെയാണ് ചെന്നൈ സ്‌കോര്‍ ഇരുപതോവറില്‍ നാല് വിക്കറ്റിന് 131 റണ്‍സിലെത്തിയത്.
