ന്യൂദല്ഹി: ഐപിഎല് പന്ത്രണ്ടാം പതിപ്പിലെ ലീഗ് മത്സരങ്ങള് അവസാനിച്ചപ്പോള് റണ്വേട്ടയില് മുന്നിലുള്ള ബാറ്റ്സ്മാന്റെ ഓറഞ്ച് തൊപ്പി ഓസീസ് താരം ഡേവിഡ് വാര്ണറുടെ ശിരസില് തന്നെ. ഏറ്റവും കൂടുതല് വിക്കറ്റെടുത്ത ബൗളര്ക്കുള്ള പര്പ്പിള് ക്യാപ്് ദക്ഷണാഫ്രിക്കന് പേസര് കഗിസോ റബഡുടെ തലയില്.
സണ്റൈസേഴ്സ് ഹൈദരാബാദ് താരമായ വാര്ണര് 692 റണ്സ് നേടിയാണ് മുന്നിലെത്തിയത്. ദല്ഹി ക്യാപിറ്റല് സ് താരമായ കഗിസോ റബഡ 47 ഓവറില് 25 വിക്കറ്റോടെയാണ് ഒന്നാം സ്ഥാനത്ത് നില്ക്കുന്നത്. പ്ലേ ഓഫില് കടന്ന സണ്റൈസേഴ്സിന് വാര്ണറുടെയും ദല്ഹിക്ക് റബഡയുടെയും സേവനം ലഭിക്കില്ല. ഇരുവരും നാട്ടിലേക്ക് മടങ്ങി. ലോകകപ്പിന്റെ ഒരുക്കങ്ങള്ക്കായാണ് വാര്ണര് മടങ്ങിയത്. അതേസമയം പരിക്കേറ്റ റബഡയെ ദക്ഷിണാഫ്രിക്ക തിരിച്ചുവിളിക്കുകയായിരുന്നു.
ബാറ്റ്സ്മാന്മാരില് കിങ്ങ്സ് ഇലവന് പഞ്ചാബിന്റെ ലോകേഷ് രാഹുല് (593) രണ്ടാം സ്ഥാനത്തും കൊല്ക്കത്തയുടെ ആന്ദ്രെ റസ്സല് മൂന്നാം സ്ഥാനത്തും നില്ക്കുന്നു. മുംബൈയുടെ ക്വിന്റണ് ഡികോക്ക് 492 റണ്സുമായി നാലാം സ്ഥാനത്താണ്.
ബൗളര്മാരില് ചെന്നൈയുടെ ഇംറാന് താഹിര് (21 വിക്കറ്റ്), രാജസ്ഥാന്റെ ശ്രേയസ് ഗോപാല് (20), കിങ്ങ്സ് ഇലവന്റെ മുഹമ്മദ് ഷമി എന്നിവരാണ് യഥാക്രമം രണ്ട്, മൂന്ന്, നാല് സ്ഥാനങ്ങളില്. ചെന്നൈ താരമായി ഇംറാന് താഹിറിന് അഞ്ചു വിക്കറ്റുകള് കൂടി നേടിയാല് പര്പ്പിള് ക്യാപ് സ്വന്തമാക്കാം.
