ആലപ്പുഴ: മലയാളികളുടെ സിനിമാ സ്വപ്നങ്ങള്ക്ക് ചിറകുകള് നല്കിയ ഉദയ സ്റ്റുഡിയോ ഓര്മകളുടെ അഭ്രപാളികളിലൊതുങ്ങാന് കാരണം സര്ക്കാരിന്റെ അനാസ്ഥ. പാതിരപ്പള്ളിയിലെ ഉദയ സ്റ്റുഡിയോയുടെ അവശേഷിക്കുന്ന ഭാഗങ്ങളും പൊളിച്ചു നീക്കാനാരംഭിച്ചു. സ്റ്റുഡിയോയ്ക്ക് മുന്നില് സ്ഥിതിചെയ്തിരുന്ന കന്യാമറിയത്തിന്റെ ശില്പ്പം കഴിഞ്ഞ ദിവസം പൊളിച്ചു നീക്കി. ചലച്ചിത്ര പ്രേമികളെയും പ്രവര്ത്തകരെയും ഏറെ ദുഃഖിപ്പിക്കുന്നതാണ് ഉദയായുടെ അസ്തമയം.
ഏട്ടര ഏക്കറുണ്ടായിരുന്ന സ്റ്റുഡിയോയുടെ അഞ്ചര ഏക്കര് നേരത്തെ സ്വകാര്യ വ്യക്തികള്ക്ക് വിറ്റിരുന്നു. ശേഷിച്ച മൂന്ന് ഏക്കര് വിടിജെ ഫിലിംസാണ് ഒന്നര ദശാബ്ദം മുന്പ് വാങ്ങിയത്. മാറ്റങ്ങളൊന്നും വരുത്താതെ തുടരുകയായിരുന്നു. എന്നാല്, ഉടമസ്ഥാവകാശം അടുത്തിടെ വിദേശമലയാളികള്ക്ക് കൈമാറിയതോടെയാണ് സ്റ്റുഡിയോ പൊളിച്ചു നീക്കാന് തീരുമാനിച്ചത്. കേരളത്തിന്റെ സിനിമാ ചരിത്രത്തിന്റെ ഭാഗമായ ഉദയ സ്റ്റുഡിയോ പൈതൃക പദ്ധതിയില് ഉള്പ്പെടുത്തി സര്ക്കാര് ഏറ്റെടുത്ത് സംരക്ഷിക്കണമെന്ന് നേരത്തെ തന്നെ ആവശ്യം ഉയര്ന്നിരുന്നു.
വിഎസ് സര്ക്കാരിന്റെ കാലത്ത് ഇതിനായി ചില ശ്രമങ്ങള് നടത്തിയെങ്കിലും പരാജയപ്പെട്ടു. അടുത്തകാലത്ത് ആലപ്പുഴയിലെ പൈതൃക സ്മാരകങ്ങള് സംരക്ഷിക്കുന്നതിനായി മന്ത്രി തോമസ് ഐസക് ചില പദ്ധതികള് പ്രഖ്യാപിച്ചെങ്കിലും ഉദയ സംരക്ഷിക്കാന് നടപടിയൊന്നുമുണ്ടായില്ല. സംസ്ഥാന സര്ക്കാര് മുന്കൈയെടുത്തിരുന്നെങ്കില് സിനിമാ പ്രവര്ത്തകരുടെ സഹകരണത്തോടെ മലയാള സിനിമയുടെ തറവാടിനെ സംരക്ഷിക്കാന് സാധിക്കുമായിരുന്നു.
ഒരു കാലത്ത് പന്ത്രണ്ട് ഏക്കറില് നിറഞ്ഞുനിന്ന ഉദയ സ്റ്റുഡിയോയില് എല്ലാ സൗകര്യങ്ങളും ഉണ്ടായിരുന്നു. ചില സീരിയലുകളുടെ ചിത്രീകരണവും അടുത്തിടെ ഇവിടെ നടന്നിരുന്നു. 1947ലാണ് നിര്മാതാവും സംവിധായകനുമായ കുഞ്ചാക്കോയുടെ നേതൃത്വത്തില് ഉദയ സ്റ്റുഡിയോയ്ക്ക് തറക്കല്ലിടുന്നത്. 1949 ജനുവരി 14ന് ഉദയയുടെ ആദ്യ ചിത്രമായ വെള്ളിനക്ഷത്രം പുറത്തിറങ്ങി. പിന്നീടിങ്ങോട്ട് മൂന്ന് പതിറ്റാണ്ടോളം മലയാള സിനിമയുടെ ചരിത്രം ഇവിടം കേന്ദ്രീകരിച്ചായിരുന്നു. ഉദയയുടെ പേരും എംബ്ലവും ഇപ്പോള് നടന് കുഞ്ചാക്കോ ബോബന്റെ ഉടമസ്ഥതയിലാണ്. കറങ്ങുന്ന ഭൂഗോളവും കൂവിയുണര്ത്തുന്ന പൂവന്കോഴിയുമാണ് ഉദയയുടെ എംബ്ലം.
