ബെംഗളൂരു: ഐപിഎല്ലില് ഇന്ന് റോയല് ചലഞ്ചേഴ്സ് ബെംഗളൂരു കിങ്സ് ഇലവന് പഞ്ചാബിനെ നേരിടും. ബെംഗളൂരുവിന്റെ സ്വന്തം തട്ടകമായ ചിന്നസ്വാമി സ്റ്റേഡിയത്തില് രാത്രി എട്ടിന് കളി തുടങ്ങും. തുടക്കത്തില് വിജയം കാണാതെ പതറിയ ബെംഗളൂരു തുടര്ച്ചയായി രണ്ട് മത്സരങ്ങള് വിജയിച്ചതിന്റെ ആത്മവിശ്വാസത്തിലാണ് ഇന്ന് പഞ്ചാബിനെ നേരിടാനൊരുങ്ങുന്നത്.
പോയിന്റ് പട്ടികയില് അവസാന സ്ഥാനക്കാരായ ബെംഗളൂരു ഇന്ന് വിജയിച്ചാല് അവസാന സ്ഥാനം മറികടന്ന് മുകളിലെത്താനാകും. ദക്ഷിണാഫ്രിക്കന് സൂപ്പര് ബൗളര് ഡെയില് സ്റ്റെയ്നിന്റെ വരവോടെ അടിമുടി മാറിയ ടീമിനെയാണ് കഴിഞ്ഞ മത്സരങ്ങളില് കളത്തില് കണ്ടത്. ആദ്യ ഓവറുകളില് കൃത്യമായി വിക്കറ്റെടുക്കാന് സ്റ്റെയിനിനാകുന്നുണ്ട്. ബാറ്റിങ്ങാണ് കോഹ്ലിയുടെയും സംഘത്തിന്റെയും പ്രധാന പ്രശ്നം. നായകന് വിരാട് കോഹ്ലിയും ഡിവില്ലിയേഴ്സും ഉള്പ്പെടുന്ന ബാറ്റിങ്ങ് നിരയ്ക്ക് സ്ഥിരത പുലര്ത്താനാകുന്നില്ല. ഓള്റൗണ്ടര് മൊയീന് അലി ഫോമിലേക്കുയര്ന്നതാണ് ടീമിന്റെ ഏക ആശ്വാസം. ഓപ്പണര് പാര്ഥിവ് പട്ടേല് ഭേദപ്പെട്ട പ്രകടനം നടത്തുന്നുണ്ട്.
മറുവശത്ത് ക്രിസ് ഗെയില്, കെ.എല്. രാഹുല് ഓപ്പണിങ്ങ് സഖ്യത്തിലാണ് പഞ്ചാബിന്റെ പ്രതീക്ഷ. സീസണില് മികച്ച ഫോമിലുള്ള ഗെയില് നാല് അര്ധസെഞ്ചുറി അടക്കം 421 റണ്സ് ടീമിനായി അടിച്ചുകൂട്ടിക്കഴിഞ്ഞു. കെ.എല്. രാഹുല് ഒരു സെഞ്ചുറിയും നാല് അര്ധസെഞ്ചുറിയും സഹിതം 399 റണ്സ് നേടി. പോയിന്റ് പട്ടികയില് പത്തു മത്സരങ്ങളില്നിന്ന് അഞ്ചു വിജയവുമായി മധ്യ സ്ഥാനത്ത് നിലയുറപ്പിച്ച പഞ്ചാബിന് ഇന്നത്തെ മത്സരം നിര്ണായകമാണ്. കഴിഞ്ഞ മത്സരത്തില് ദല്ഹി ക്യാപിറ്റല്സിനോട് അഞ്ച് വിക്കറ്റിന് തോറ്റാണ് പഞ്ചാവിന്റെ വരവ്. ഓപ്പണര്മാരെ മാറ്റിനിര്ത്തിയാല് മധ്യനിര ഫോമിലല്ല. മായങ്ക് അഗര്വാള്, ഡേവിഡ് മില്ലര്, മന്ദീപ് സിങ്, സാം കറന് എന്നിവര് വലിയ സ്കോര് കണ്ടെത്തേണ്ടതുണ്ട്. മുഹമ്മദ് ഷാമിയുടെ നേതൃത്വത്തിലുള്ള പേസ് നിരയും നായകന് അശ്വിന് നയിക്കുന്ന സ്പിന് നിരയും ഭേദപ്പെട്ട പ്രകടനം നടത്തുന്നുണ്ട്. ഇരുടീമും ഇതിനുമുമ്പ് 23 തവണ നേര്ക്കുനേര് വന്നപ്പോള് പന്ത്രണ്ട് തവണയും പഞ്ചാബ് വിജയം കണ്ടു. ബെംഗളൂരുവിന് വിജയിക്കാനായത് പതിനൊന്ന് തവണയും.
