തിരുവനന്തപുരം: തൊടുപുഴയില് മര്ദനമേറ്റ കുട്ടിയുടെ അച്ഛന് ബിജുവിന്റെ മരണത്തില് ദുരൂഹതയുണ്ടെന്നും ഇത് അന്വേഷിക്കണമെന്നാവശ്യപ്പെട്ട് ബന്ധുക്കള് മുഖ്യമന്ത്രിക്ക് പരാതി നല്കി. കഴിഞ്ഞ മേയിലാണ് ബിജു മരിച്ചത്. ഹൃദയാഘാതമാണെന്ന നിഗമനത്തില് മൃതദേഹം ദഹിപ്പിച്ചു. ബിജുവിന്റെ മൂത്തമകനെ ക്രൂരമായി മര്ദിച്ച അരുണ് ആനന്ദിന് ബിജുവിന്റെ മരണത്തില് പങ്കുള്ളതായി സംശയിക്കുന്നതായി ബിജുവിന്റെ അച്ഛന് ബാബു പറഞ്ഞു.
പത്തു വര്ഷം മുന്പാണ് ബിജു വിവാഹിതനായത്. സി-ഡിറ്റിലെ ജീവനക്കാരനായിരുന്നപ്പോഴായിരുന്നു വിവാഹം. വിവാഹത്തിന് അരുണ് പങ്കെടുത്തിരുന്നില്ല. പിന്നീട് പണം കടം കൊടുത്തതുമായി ബന്ധപ്പെട്ട് ഇരുവരും തമ്മില് വാക്കേറ്റം ഉണ്ടായിരുന്നു. ഇതിനു ശേഷം അരുണ് കല്ലാട്ടുമുക്കിലെ വീട്ടില് വന്നത് ബിജു മരിച്ചതിന് ശേഷമാണ്. എന്നാല് പിന്നീടുള്ള ഇയാളുടെ വരവ് ബന്ധുക്കളില് സംശയം ഉയര്ത്തിയിരുന്നു. ബിജുവും ഭാര്യയും തമ്മില് വളരെ സന്തോഷത്തില് കഴിഞ്ഞതിനാല് ഒരു സംശയവും തോന്നിയിരുന്നില്ലെന്ന് ബാബു വ്യക്തമാക്കി.
അതേസമയം ആശുപത്രിയില് ചികിത്സയില് കഴിയുന്ന കുട്ടിയുടെ നില അതീവ ഗുരുതരമായി തുടരുകയാണ്. തലച്ചോറിലേക്കുള്ള രക്തയോട്ടം 90% നിലച്ച കുട്ടി വെന്റിലേറ്റര് സഹായത്തോടെയാണ് ജീവന് നിലനിര്ത്തുന്നത്. സര്ക്കാര് നിര്ദ്ദേശപ്രകാരം കഴിഞ്ഞ ദിവസം കോട്ടയം മെഡിക്കല് കോളേജില് നിന്നുള്ള മൂന്നംഗ ഡോക്ടര്മാരടങ്ങിയ വിദഗ്ധ സംഘം കോലഞ്ചേരി മെഡിക്കല് കോളജ് ആശുപത്രിയിലെത്തി കുട്ടിയെ പരിശോധിച്ചിരുന്നു. മരുന്നുകളോട് കുട്ടിയുടെ ശരീരം പ്രതികരിക്കുന്നില്ലെങ്കിലും നിലവിലുള്ള ചികിത്സാ തുടരാനാണ് മെഡിക്കല് സംഘം നല്കിയ നിര്ദ്ദേശം.
കഴിഞ്ഞ വ്യാഴാഴ്ച പുലര്ച്ചെയാണ് തലയോട്ടി പൊട്ടിയ നിലയില് കുഞ്ഞിനെ അമ്മയും സുഹൃത്തായ അരുണ് ആനന്ദും ചേര്ന്ന് കോലഞ്ചേരിയിലെ സ്വകാര്യ ആശുപത്രിയില് കൊണ്ടുവരുന്നത്. രക്തത്തില് കുളിച്ച കുഞ്ഞിന്റെ തലച്ചോറ് പുറത്തു വന്ന നിലയിലായിരുന്നു. എന്താണ് സംഭവിച്ചതെന്ന് ഡോക്ടര്മാര് ചോദിച്ചപ്പോള് കുട്ടിയുടെ അമ്മ ആദ്യം സോഫയില് നിന്ന് വീണ് തല പൊട്ടിയെന്നാണ് പറഞ്ഞത്. എന്നാല്, കുട്ടിയെ പരിശോധിച്ച ഡോക്ടര്മാര്ക്ക് സംശയം തോന്നി. ബലമുള്ള എന്തോ വസ്തു വച്ച് തലയിലടിച്ച പോലെയായിരുന്നു കുട്ടിയുടെ പരിക്കുകള്.
കുട്ടിയുടെ പരിചരണത്തിനായിരുന്നു ആദ്യ പരിഗണന നല്കേണ്ടത് എന്നതിനാല് ആദ്യം ഡോക്ടര്മാര് കുഞ്ഞിന് അടിയന്തരശസ്ത്രക്രിയ നടത്തുകയും ഒപ്പം പൊലീസിനെ വിവരമറിയിക്കുകയും ചെയ്തു. പൊലീസെത്തി കുട്ടിയുടെ അമ്മയുടെ സുഹൃത്തായ അരുണ് ആനന്ദിനെ ചോദ്യം ചെയ്തതോടെയാണ് മനസ്സാക്ഷിയെ ഞെട്ടിച്ച മര്ദ്ദനവിവരം പുറംലോകമറിഞ്ഞത്.
