ചവറ: ശബരിമല വിഷയത്തില് വീടുകയറിയുള്ള പോലീസിന്റെ പരിശോധന അധികമായപ്പോള് മകന് സ്റ്റേഷനില് കീഴടങ്ങി. മനംനൊന്ത അച്ഛന് ആത്മഹത്യ ചെയ്തു. ചവറ പടിഞ്ഞാറ്റക്കര തേവലക്കര കൊച്ചുപന്താടിയില് വീട്ടില് മോഹനന്പിള്ള (62)യാണ് ഇന്നലെ വൈകിട്ട് മൂന്നിന് വീട്ടിനുള്ളില് തൂങ്ങിമരിച്ചത്.
ശബരിമല കര്മസമിതിയുടെ പ്രകടനത്തില് പങ്കെടുത്തതിന്റെ പേരില് മോഹനന്പിള്ളയുടെ മകന് മനോജിനെത്തേടി നിരവധി തവണയാണ് കൊല്ലത്തുനിന്നുള്ള പോലീസ് സ്പെഷ്യല് സ്ക്വാഡ് ഇവരുടെ വീട്ടില് കയറിയത്. സ്റ്റേഷനില് ഹാജരായില്ലെങ്കില് ഇതു തുടരുമെന്നായിരുന്നു പോലീസിന്റെ ഭീഷണി.
ഗള്ഫിലായിരുന്ന മനോജ് മടങ്ങിയെത്തി വീട്ടുകാര്യങ്ങള് നോക്കുകയായിരുന്നു. അതിനിടെ കഴിഞ്ഞദിവസം ചവറ സിഐ ചന്ദ്രദാസിനെ ശബരിമലയിലേക്ക് മാറ്റി നിയോഗിച്ചിരുന്നു. കൂടുതല് ഹിന്ദുസംഘടനാപ്രവര്ത്തകരെ അറസ്റ്റ് ചെയ്യാത്തതിനാണ് സിഐയെ മാറ്റിയതെന്നാണ് വിവരം.
അതോടെ പോലീസിന്റെ സമ്മര്ദം കൂടി. ഇന്നലെ ഉച്ചയ്ക്ക് രണ്ടിന് മനോജ് ചവറ സ്റ്റേഷനില് ഹാജരായി. മകനെ അറസ്റ്റ് ചെയ്തുവെന്നറിഞ്ഞാണ് മോഹനന്പിള്ള ആത്മഹത്യ ചെയ്തത്. ഭാര്യ ആനന്ദഭായിയാണ് മോഹനന്പിള്ള മുറിക്കുള്ളില് തൂങ്ങിനില്ക്കുന്നത് ആദ്യം കണ്ടത്. മൃതദേഹം ജില്ലാ ആശുപത്രിയില് മോര്ച്ചറിയില് സൂക്ഷിച്ചിരിക്കുകയാണ്. സംഭവത്തില് പ്രതിഷേധിച്ച് ഇന്ന് ജില്ലയില് കരിദിനം ആചരിക്കും.
