കൊച്ചി : കെഎസ്ആര്ടിസി എംപാനല് ജീവനക്കാരെ ആവശ്യമെങ്കില് ജോലിയില് നിയമിക്കാമെന്ന് ഹൈക്കോടതി. പിഎസ്സി ലിസ്റ്റ് വഴിയുള്ള നിയമനത്തിലും ഒഴിവുകള് നികത്തപ്പെട്ടില്ലെങ്കില് എംപാനലില് നിന്ന് ആളെയെടുക്കാമെന്നാണ് പുതിയ നിര്ദ്ദേശം. കൂട്ടപിരിച്ചുവിടലിന് വിധേയമായ എംപാനല് ജീവനക്കാര്ക്ക് ആശ്വാസം പകരുന്നതാണ് ഹൈക്കോടതിയുടെ ഈ ഉത്തരവ്. ഹര്ജിയില് വിശദമായ വാദത്തിന് വെള്ളിയാഴ്ച വീണ്ടും പരിഗണിക്കും.
4071 എംപാനല് ജീവനക്കാരെ പിരിച്ചുവിട്ട് പിഎസ്സി വഴി 4051 ആളുകള്ക്ക് ജോലി നല്കാന് കഴിഞ്ഞദിവസം ഹൈക്കോടതി ഉത്തരവിട്ടിരുന്നു. എന്നാല് ഇതില് 1500 പേര് പോലും ജോലിക്ക് ഹാജരാകാന് സാധ്യതയില്ലെന്ന റിപ്പോര്ട്ടിനെ തുടര്ന്നാണ് ഹൈക്കോടതി പുതിയ നിര്ദ്ദേശം മുന്നോട്ടുവെച്ചിരിക്കുന്നത്.
എംപാനല് തസ്തികയിലുള്ളവരെ പിരിച്ചുവിട്ടതിനെ തുടര്ന്ന് ആവശ്യത്തിന് ജീവനക്കാര് ഇല്ലാത്തതിനാല് സര്വ്വീസ് വെട്ടിക്കുറയ്ക്കേണ്ട സ്ഥിതിയിലേക്ക് നീങ്ങഇയിരുന്നു. യാത്രക്കാര്ക്കും ഇത് ബുദ്ധിമുട്ടുണ്ടാക്കുന്നതിനാലാണ് ആവശ്യമെങ്കില് എംപാനല്കാര്ക്ക് ജോലിയില് തുടരാമെന്ന് ഹൈക്കോടതി ഉത്തരവിട്ടത്.
അതിനിടെ കെഎസ്ആര്ടിസിയില് കുറഞ്ഞത് മൂന്നു വര്ഷമെങ്കിലും ജോലിചെയ്യാന് താത്പ്പര്യമുള്ളവര് മാത്രം പ്രവേശിച്ചാല് മതിയെന്ന് എംഡി ടോമിന് ജെ. തച്ചങ്കരി അഭിപ്രായപ്പെട്ടു. ജോലിയില് പ്രവേശിച്ച് ചെറിയ കാലയളവിനുള്ളില് മറ്റൊരു ജോലിക്കായി റിലീവ് ഓര്ഡര് നല്കണമെന്നാവശ്യപ്പെട്ടാല് അത് തരില്ല. കുറഞ്ഞത് മൂന്നു വര്ഷത്തേയ്ക്കെങ്കിലും ബോണ്ട് ഏര്പ്പെടുത്താന് ശ്രമിക്കുമെന്നും തച്ചങ്കരി അറിയിച്ചു.
ഹൈക്കോടതി ഉത്തരവിനെ തുടര്ന്ന് ജോലിയില് പ്രവേശിക്കാനെത്തിയ ഉദ്യോഗാര്ത്ഥികള്ക്ക് സംഘടിപ്പിച്ച ചടങ്ങിലാണ് തച്ചങ്കരിയുടെ ഈ പ്രഖ്യാപനം. കൂടാതെ പുതിയ ജീവനക്കാര്ക്ക് എംഡിയുടെ അധികാരം ഉപയോഗിച്ച് താത്കാലിക കണ്ടക്ടര് ലൈസന്സ് നല്കും. പുതിയ നിയമനത്താല് കെഎസ്ആര്ടിസിക്കുണ്ടായ സാമ്പത്തിക പ്രതിസന്ധി ഇതിലൂടെ മറികടക്കുന്നതിനാണെന്നും അറിയിച്ചു.
പുതിയ ജീവനക്കാര്ക്കായി വെള്ളിയാഴ്ച മുതല് ആരംഭിക്കുന്ന പരിശീലനം കഴിയുന്നത്ര വേഗത്തില് പൂര്ത്തിയാക്കി ജോലിയില് പ്രവേശിക്കണം. ഇതില് മികവ് പുലര്ത്തുന്നവര്ക്ക് പ്രത്യേക സമ്മാനം ഉണ്ടാകും.
സര്ക്കാരില് നിന്ന് കെഎസ്ആര്ടിസിക്ക് പ്രത്യേക സഹായങ്ങളൊന്നും ലഭിക്കാന് സാധ്യത ഇല്ലാത്തതിനാല് ജോലിയില് പ്രവേശിച്ചയുടന് ആരും ലീവ് എടുക്കരുത്. ലാഭത്തിലായാല് സര്ക്കാര് ആനുകൂല്യങ്ങള് കൂടുതലായി ലഭിക്കുമെന്നും തച്ചങ്കരി കൂട്ടിച്ചേര്ത്തു.
