കൊച്ചി: നടി ലീന മരിയ പോളിന്റെ ബ്യൂട്ടിപാര്ലറിന് നേരെയുണ്ടായ വെടിവയ്പ്പില് ഹവാലാ ഇടപാടുകളെ കേന്ദ്രീകരിച്ച് പോലീസ് അന്വേഷണം ആരംഭിച്ചു. ലീനയുടെ സാമ്പത്തിക ഇടപാടുകള്ക്ക് സംഭവവുമായി ബന്ധമുണ്ടെന്നാണ് കരുതുന്നത്. പണമിടപാടുമായി ബന്ധപ്പെട്ട തര്ക്കമാണ് സംഭവത്തിന് പിന്നിലെന്നും വെടിവയ്പ് നടത്തിയത് ഭയപ്പെടുത്താനാണെന്നും പോലീസ് സംശയിക്കുന്നു. വെടിവയ്പ്പുമായി ബന്ധപ്പെട്ട് ലീനയുടെ മൊഴിയെടുക്കും.
നിരവധി സാമ്പത്തിക തട്ടിപ്പ് കേസുകളില് പ്രതിയായ ലീന മരിയ പോളിനും പങ്കാളി സുദേഷ് ചന്ദ്രശേഖറിനും രാജ്യത്തെ വന്കിട ഹവാല ഇടപാടുകളുമായി ബന്ധമുണ്ടെന്ന് എന്ഫോഴ്സ്മെന്റ് ഡയറക്ടറേറ്റ് അടക്കം നേരത്തെ തന്നെ കണ്ടെത്തിയിരുന്നു. രണ്ടാഴ്ച മുമ്പ്് ദുബായിലുണ്ടായിരുന്ന ലീന പിന്നീട് ഹൈദരാബാദില് എത്തിയിട്ടുണ്ടെന്നാണ് പോലീസിന് ലഭിച്ചിരിക്കുന്ന വിവരം.
ലീന മരിയ പോളിന്റെ മൊഴിയെടുത്താല് വെടിവയ്പ്പിന്റെ പിന്നിലാരാെണന്ന് വ്യക്തമാകുമെന്ന് പോലീസ് പറഞ്ഞു. നടിയോട് അന്വേഷണവുമായി ബന്ധപ്പെട്ട് മൊഴി നല്കാന് കേരളത്തിലെത്താന് നിര്ദേശം നല്കി. നടിയുടെ ഇന്റര്നെറ്റ് കോളുകളടക്കം പോലീസ് പരിശോധിക്കും.
ലീന മരിയ പോളും സുഹൃത്തായ സുദേഷ് ചന്ദ്രശേഖറും നിരവധി ഹവാല ഇടപാടുകളില് പ്രതികളാണ്. കൊച്ചി കേന്ദ്രീകരിച്ച് ഇവര് ഹവാല ഇടപാടുകള് നടത്തിയിരുന്നതായി പോലീസിന് വിവരം ലഭിച്ചിട്ടുണ്ട്.
ബ്യുട്ടി പാര്ലറിന് മുന്നില് നിന്ന് ലഭിച്ച രവി പൂജാരയുടെ പേരെഴുതിയ കുറിപ്പില് അക്ഷരത്തെറ്റ് കണ്ടെത്തിയിരുന്നു. അതുകൊണ്ടുതന്നെ ഹിന്ദി നന്നായി അറിയാത്ത ഒരാളാണ് ഇത് എഴുതിയതെന്നാണ് പോലീസ് നിഗമനം. നടിയുടെ സാമ്പത്തിക പശ്ചാത്തലമോ നടിയുമായി മുന് പരിചയമുള്ള കൊച്ചിയില് തന്നെയുള്ള ആരെങ്കിലുമോ ആകാം സംഭവത്തിന് പിന്നില് എന്ന സാധ്യതയും പോലീസ് പരിശോധിക്കുന്നുണ്ട്്. പ്രാദേശിക ഗുണ്ടാ സംഘങ്ങള് കേന്ദ്രീകരിച്ചും അന്വേഷണം ആരംഭിച്ചു.
അധോലോകത്തിലെ രവി പൂജാരയുടെ പേര് പറഞ്ഞായിരുന്നു ഭീഷണി. വെടിയുതിര്ത്തവര് ബൈക്കില് രക്ഷപ്പെട്ടു. സിസിടിവി ദൃശ്യങ്ങളുടെ അടിസ്ഥാനത്തില് അന്വേഷണം ആരംഭിച്ചു. രവി പൂജാരയുടെ പേര് ആരോപിക്കുന്നത് അന്വേഷണം വഴിതെറ്റിക്കാനാണെന്നാണ് പോലീസിന്റെ പ്രാഥമിക നിഗമനം. നടി ലീന മരിയ പോളിനെ ചോദ്യം ചെയ്യുന്നതോടെ ഈ കാര്യത്തില് കൂടുതല് വ്യക്തത വരും.
പിന്നില് രവി പൂജാര തന്നെ
കൊച്ചി: വെടിവയ്പ്പിനു പിന്നില് അധോലോകസംഘത്തിലെ രവി പൂജാര തന്നെയാണെന്ന് ബ്യൂട്ടി പാര്ലറിന്റെ ഉടമയും നടിയുമായ ലീനാ മരിയ പോള്. നേരത്തെ രണ്ട് തവണ രവി പൂജാര തന്നെ ഭീഷണിപ്പെടുത്തുകയും പണം ആവശ്യപ്പെടുകയും ചെയ്തിട്ടുണ്ടെന്ന് ലീന പറഞ്ഞു.
ആദ്യം അഞ്ച് കോടി രൂപയും പിന്നീട് 25 കോടി രൂപയും ആവശ്യപ്പെട്ടു. ബോളിവുഡില് രവി നടത്തിയ ഇടപെടലുകളുടെ പേരിലാണ് പണം ആവശ്യപ്പെട്ടിരുന്നത്. ഇക്കാര്യം പോലീസിനെ ധരിപ്പിക്കുമെന്നും ലീന പറഞ്ഞു. എന്നാല് സുദേഷ് ചന്ദ്രശേഖരന് ഉള്പ്പെട്ട ഹവാല ഇടപാടുകളിലേക്കാണ് ബ്യൂട്ടി പാര്ലര് വെടിവയ്പ്പ് സംബന്ധിച്ച അന്വേഷണം നീങ്ങുന്നതെന്നാണ് റിപ്പോര്ട്ടുകള്. രവി പൂജാരയുടെ പേര് പറയുന്നത് അന്വേഷണം വഴിതെറ്റിക്കാനാണെന്നുമാണ് പോലീസ് പറയുന്നത്.
