കോഴിക്കോട്: ശബരിമലയെ തകര്‍ക്കാനുള്ള ശ്രമത്തിന് സിപിഎം കനത്ത വിലനല്‍കേണ്ടി വരുമെന്ന് മഹിളാമോര്‍ച്ച സംസ്ഥാന പ്രസിഡന്റ് പ്രൊഫ.വി.ടി. രമ. ശബരിമല കര്‍മസമിതി കോഴിക്കോട് മുതലക്കുളം മൈതാനത്ത് സംഘടിപ്പിച്ച സ്ത്രീശക്തി സംഗമത്തില്‍ മുഖ്യപ്രഭാഷണം നടത്തുകയായിരുന്നു അവര്‍.
ഹൈന്ദവസമൂഹം ഒറ്റക്കെട്ടായി വരുന്ന ശബരിമലയെ തകര്‍ക്കുകയെന്നത് എന്നും സിപിഎമ്മുകാരുടെ ലക്ഷ്യമായിരുന്നു. അയ്യപ്പന്റെ കറുപ്പിന്റെ വിശുദ്ധിക്കു മുന്നില്‍ കമ്മ്യൂണിസം ഇല്ലാതാകുമെന്ന തിരിച്ചറിവിലാണ് ശബരിമലയെ ഇല്ലാതാക്കാനുള്ള ശ്രമങ്ങള്‍ ആരംഭിച്ചത്. പല ഘട്ടങ്ങളിലായി നടത്തിയ ശ്രമങ്ങള്‍ പരാജയപ്പെട്ടു. ഇപ്പോള്‍ സുപ്രീംകോടതി വിധിയുടെ മറവില്‍ ആ ശ്രമം കമ്മ്യൂണിസ്റ്റുകള്‍ തുടരുകയാണ്. പന്തളത്തെ തെരുവീഥികളില്‍ അമ്മമാര്‍ തെളിച്ചുവിട്ട ജ്യോതി ലോകമാനം പടര്‍ന്നു. ഈ ജാള്യത മറയ്‌ക്കാനാണ് സര്‍ക്കാര്‍ സംവിധാനങ്ങള്‍ ഉപയോഗപ്പെടുത്തി മതില്‍ പണിയാന്‍ ഒരുങ്ങുന്നതെന്നും അവര്‍ പറഞ്ഞു. 26ന് നടക്കുന്ന മകരജ്യോതി വന്‍വിജയമാക്കി മാറ്റാന്‍ എല്ലാവരും ഒറ്റക്കെട്ടായി രംഗത്തിറങ്ങണമെന്നും അവര്‍ കൂട്ടിച്ചേര്‍ത്തു.
റിട്ട. ജഡ്ജ് പി.എന്‍. ശാന്തകുമാരി മേനോന്‍ അധ്യക്ഷയായി. ഉള്ളൂര്‍ സാഹിത്യപുരസ്‌കാരം നേടിയ ജയശ്രീ കിഷോറിനെ ചടങ്ങില്‍ ആദരിച്ചു. ബിഎംഎസ് സംസ്ഥാന സെക്രട്ടറി അഡ്വ. ടി.പി. സിന്ധുമോള്‍, പി. ഹരീഷ്‌കുമാര്‍, സി.എസ്. സത്യഭാമ, മഞ്ജുള രവീന്ദ്രന്‍ തുടങ്ങിയവര്‍ സംസാരിച്ചു. രാഷ്‌ട്രസേവികാസമിതി പ്രാന്തകാര്യവാഹിക ഡോ. ആര്യാദേവി, ഭാരതീയ വിദ്യാനികേതന്‍ സംസ്ഥാന അധ്യക്ഷ പ്രൊഫ. സുമതി ഹരിദാസ്, ഹിന്ദുഐക്യവേദി സംസ്ഥാന ഉപാധ്യക്ഷ അഡ്വ. എ.സി. അംബിക തുടങ്ങിയവര്‍ പങ്കെടുത്തു.
