ന്യൂദല്ഹി: റഫാല് കരാറുമായി ബന്ധപ്പെട്ട പ്രതിപക്ഷ ആരോപണങ്ങളില് അഗ്നിശുദ്ധി വരുത്തി പ്രധാനമന്ത്രി നരേന്ദ്ര മോദിയും കേന്ദ്രസര്ക്കാരും. യുദ്ധവിമാന ഇടപാടില് അഴിമതിയില്ലെന്നും കരാര് നടപ്പാക്കിയതില് സംശയിക്കേണ്ട യാതൊരു സാഹചര്യവുമില്ലെന്നും വ്യക്തമാക്കിയ കോടതി അന്വേഷണം ആവശ്യപ്പെട്ടുള്ള മുഴുവന് ഹര്ജികളും തള്ളി. സോണിയാ ഗാന്ധിയിലേക്ക് നീളുന്ന അഗസ്ത വെസ്റ്റ്ലാന്റ് അഴിമതിയുള്പ്പെടെ പ്രതിരോധിക്കാന് അടുത്ത പൊതുതെരഞ്ഞെടുപ്പില് റഫാല് പ്രചാരണായുധമാക്കാനിരുന്ന കോണ്ഗ്രസ്സിന് കനത്ത തിരിച്ചടിയാണ് വിധി.
വ്യാജ പ്രചാരണം നടത്തി രാജ്യത്തെ വഞ്ചിച്ച രാഹുലും കോണ്ഗ്രസ്സും മാപ്പ് പറയണമെന്ന് ബിജെപി അധ്യക്ഷന് അമിത് ഷാ ആവശ്യപ്പെട്ടു. ചീഫ് ജസ്റ്റിസ് രഞ്ജന് ഗൊഗോയ്, ജസ്റ്റിസുമാരായ എസ്.കെ. കൗള്, കെ.എം. ജോസഫ് എന്നിവരുള്പ്പെട്ട ബെഞ്ചാണ് നിര്ണായക വിധി പ്രസ്താവം നടത്തിയത്. കോടതി നിരീക്ഷണത്തില് അന്വേഷണം തേടിയുള്ള ഹര്ജികളാണ് തള്ളിയത്.
അത്യാധുനിക ആയുധങ്ങള് വഹിക്കാന് ശേഷിയുള്ള യുദ്ധവിമാനമാണ് റഫാല്. വ്യോമസേനയുടെ നിരന്തര ആവശ്യം കണക്കിലെടുത്ത് ഫ്രഞ്ച് കമ്പനിയായ ഡസോള്ട്ട് ഏവിയേഷനില്നിന്നും 36 വിമാനങ്ങള് വാങ്ങാന് 2016 സപ്തംബറിലാണ് മോദി ഫ്രഞ്ച് പ്രസിഡന്റ് ഫ്രാന്സ്വാ ഒലാന്തുമായി കരാറൊപ്പിട്ടത്. യുപിഎ സര്ക്കാരിന്റെ കാലത്ത് 126 വിമാനങ്ങള് വാങ്ങുന്നതിന് ചര്ച്ചകള് നടന്നെങ്കിലും എണ്ണത്തിലോ വിലയിലോ തീരുമാനത്തിലെത്തിയിരുന്നില്ല.
ദിവസങ്ങളോളം നീണ്ട ചൂടേറിയ വാദങ്ങള്ക്കൊടുവിലാണ് സുപ്രീംകോടതി കേന്ദ്രസര്ക്കാരിന് ക്ലീന് ചിറ്റ് നല്കിയത്. ആരോപണങ്ങള് വിശദമായി പരിശോധച്ച കോടതി, വ്യോമസേനാ ഉപമേധാവിയെയും മറ്റ് ഉദ്യോഗസ്ഥരെയും വിളിച്ചുവരുത്തി കാര്യങ്ങള് ചോദിച്ചറിഞ്ഞു. നടപടിക്രമങ്ങളുടെയും വിലവിവരങ്ങളുടെയും വിശദാംശങ്ങള് കേന്ദ്രസര്ക്കാര് മുദ്രവെച്ച കവറില് കോടതിയില് സമര്പ്പിച്ചിരുന്നു.
ആരോപണങ്ങളും കോടതിയുടെ തീര്പ്പും
യുദ്ധവിമാനങ്ങള്ക്ക് യുപിഎ കാലത്തേക്കാള് വില കൂടുതല്
കോടതി: വിലയില് വിശദമായ പരിശോധനയുടെ ആവശ്യമില്ല. രാജ്യസുരക്ഷ, അറ്റകുറ്റപ്പണികള്, വിമാനങ്ങള്ക്കൊപ്പമുള്ള അനുബന്ധ ആയുധങ്ങള് തുടങ്ങിയവ പരിഗണിക്കുമ്പോള് ഇപ്പോഴത്തെ കരാറാണ് സാമ്പത്തികമായി കൂടുതല് മെച്ചമെന്നാണ് കേന്ദ്ര സര്ക്കാര് വിശദീകരിച്ചത്. ഇതിലധികം കോടതിക്ക് ഒന്നും പറയാനില്ല. പഴയ വിലയും പുതിയ വിലയും താരതമ്യം ചെയ്യാന് കോടതിക്ക് ജുഡീഷ്യല് അധികാരങ്ങള് ഉപയോഗിക്കാനാകില്ല.
യുപിഎ കാലത്ത് 126 വിമാനങ്ങള് വാങ്ങാന് തീരുമാനിച്ചിരുന്നു
കോടതി: 126 യുദ്ധവിമാനങ്ങള് വാങ്ങണം എന്ന് കേന്ദ്രസര്ക്കാരിനോട് നിര്ദേശിക്കാന് സാധിക്കില്ല. നടപടിക്രമങ്ങളില് സംശയിക്കേണ്ടതായി ഒന്നും തന്നെയില്ല. റഫാല് വിമാനങ്ങളുടെ ഗുണനിലവാരത്തിലും സംശയമില്ല.
റിലയന്സ് ബന്ധം
കോടതി: ഇന്ത്യയിലെ കരാര് പങ്കാളിയെ തെരഞ്ഞെടുക്കേണ്ടത് ഡസോള്ട്ട് ഏവിയേഷനാണ്. സര്ക്കാരിന് ഇതില് പങ്കില്ല. കരാര് സാമ്പത്തികമായി ആരെയെങ്കിലും സഹായിച്ചുവെന്ന് കരുതാനാകില്ല. നടപടിക്രമങ്ങള് സംശയിക്കേണ്ടതില്ല.
