സന്നിധാനം: യതീഷ് ചന്ദ്ര എന്നോട് ചോദിച്ചതുപോലെ മുഖ്യമന്ത്രിയോട് ചോദിക്കുമോയെന്ന് കേന്ദ്രമന്ത്രി പൊന് രാധാകൃഷ്ണന്. എല്ലാ വാഹനങ്ങളും കടത്തിവിടണമെന്നു പറഞ്ഞ എന്നോട് ശബരിമലയില് എന്തു സംഭവിച്ചാലും നിങ്ങള് അതിന്റെ ഉത്തരവാദിത്തം ഏറ്റെടുക്കുമോയെന്നാണ് ചോദിച്ചത്. അതേ ചോദ്യം കേരളാ മുഖ്യമന്ത്രിയോട് ചോദിക്കാന് ധൈര്യമുണ്ടോ; അദ്ദേഹം ചോദിച്ചു. എന്നോട് എസ്പി ശബ്ദമുയര്ത്തിയാണ് ചോദിച്ചത്. അത് ശരിയാണോ അതിന് ആരാണ് അയാള്ക്ക് അധികാരം നല്കിയത്. അദ്ദേഹം ചോദിച്ചു.
ശബരിമലയെ തകര്ക്കാന് സംസ്ഥാന സര്ക്കാര് മാസ്റ്റര്പ്ലാന് തയാറാക്കിയിരിക്കുകയാണെന്നും അദ്ദേഹം സന്നിധാനത്ത് ദര്ശനം നടത്തിയ ശേഷം മാധ്യമപ്രവര്ത്തകരോട് പറഞ്ഞു.
വലിയ മാസ്റ്റര് പ്ലാന് പ്രകാരമാണ് ഇതെല്ലാം നടപ്പാക്കുന്നതെന്നാണ് ് നിലയ്ക്കലില് വച്ച് എസ്പി യതീഷ് ചന്ദ്ര എന്നോട് പറഞ്ഞത്, മന്ത്രി പറഞ്ഞു. ശബരിമലയില് ആരും വരാതിരിക്കാനുള്ള മാസ്റ്റര് പ്ലാനാണ് നടക്കുന്നത്. ശബരിമലയിലെ നിരോധനാജ്ഞ എത്രയും പെട്ടെന്ന് പിന്വലിക്കണം. പമ്പ വരെ വാഹനങ്ങള് കടത്തിവിടണം. ശരണം വിളിക്കാന് അനുവദിക്കണം, മന്ത്രി ആവശ്യപ്പെട്ടു.
ആറു വയസുമുതല് എത്തുന്നതാണെന്നും ഇന്നുവരെ ആളൊഴിഞ്ഞ പതിനെട്ടാംപടി കണ്ടിട്ടില്ലെന്നും മന്ത്രി പറഞ്ഞു. ഒരു മനസും ഒരുചിന്തയും ഉണ്ടാകേണ്ട ഇടമാണ്. ഒരുമിച്ച് വരേണ്ട ഇടമാണ്. ഒരുമിച്ച് ആരാധന നടത്തേണ്ട ഇടം. പക്ഷെ ഇപ്പോള് അത് നഷ്ടപ്പെട്ടു. ശരണമന്ത്രം മുഴക്കുന്നത് വരെ വിലക്കി. ഹിന്ദു തീര്ഥാടകരെ വാവരുടെ അടുത്ത് പോകുന്നത് തടഞ്ഞതിലൂടെ സംസ്ഥാന സര്ക്കാര് മതങ്ങള്ക്കിടയില് വേര്തിരിവ് സൃഷ്ടിക്കുകയാണ്.
സ്വന്തം വാഹനത്തില് പമ്പയില് വരാനാകില്ല. തന്നെ പോലും സ്വന്തം വാഹനത്തില് കയറാന് അനുവദിക്കാത്തതിനാല് ബസിലാണ് വന്നത്. നിലയ്ക്കലില് നിന്ന് പമ്പയിലേക്കുള്ള ബസില് 50 തീര്ഥാടകരുണ്ടാകും. അവര് ഒരുമിച്ചെത്തുമ്പോള് നിരോധനാജ്ഞയ്ക്ക് അര്ഥമുണ്ടോയെന്നും മന്ത്രി ചോദിച്ചു. ചില പ്രശ്നക്കാര് ഉണ്ടെന്നാണ് പോലീസ് പറയുന്നത്. പ്രശ്നക്കാരെയും തീര്ഥാടകരെയും തിരിച്ചറിയാന് മെക്കാനിസം വല്ലതുമുണ്ടോയെന്ന് ചോദിച്ചപ്പോള് മൗനമാണ്, അദ്ദേഹം പറഞ്ഞു.
