തലശ്ശേരി: ഭരണക്കാരായ രാഷ്ടീയ യജമാനന്മാരെ പേടിച്ച് നിയമ പാലകര് കണ്ണടക്കുന്നത് കാരണം സ്ഥലകാല ഭേദമില്ലാതെ നിരോധിത മേഖലയില് കടന്നുള്ള പ്രചരണ വാഹനങ്ങളൂടെ ഇടിവെട്ട് അട്ടഹാസങ്ങള്ക്ക് കോടതി നേരിട്ട് താക്കീത് നല്കി. ആശുപത്രിയെന്നോ സ്കൂളെന്നോ കോടതി പരിസരമെന്നോ കണക്കിലെടുക്കാതെ തുടരുന്ന ധിക്കാരപരമായ കോലാഹലങ്ങള്ക്കെതിരെ ശക്തമായ നടപടി എടുക്കണമെന്ന് പലവട്ടം ന്യായാധിപന്മാര് പോലീസിന് നിര്ദ്ദേശം നല്കിയിരുന്നെങ്കിലും ഭരണകക്ഷികളില്പ്പെട്ടവരുടേതാണെങ്കില് കണ്ണടക്കുകയാണ് പതിവ്.
ഏറ്റവുമൊടുവില് സിപിഐക്കാരുടെ വാഹനത്തിലെ പ്രചരണം കോടതി പ്രവര്ത്തനത്തെ പോലും അലങ്കോലപ്പെടുത്തുന്ന സ്ഥിതിയിലെത്തിയതോടെ തലശ്ശേരി മൂന്നാം അഡിഷണല് കോടതിയിലെ ന്യായാധിപന് തന്നെ സഹികെട്ടു. കോടതി സുരക്ഷാ ചുമതലയുണ്ടായ പോലീസിനോടും സര്ക്കാര് അഭിഭാഷകനോടും പ്രചാരണ വാഹനം ഉടന് കസ്റ്റഡിയിലെടുക്കാന് ജഡ്ജ് ഉത്തരവിട്ടു. എന്നാല് ആദ്യഘട്ടമെന്ന പരിഗണനയില് ശാസിച്ച് താക്കീത് നല്കി വിട്ടയക്കുകയായിരുന്നു. കോളാമ്പി മൈക്ക് നിരോധിച്ചതോടെ കാതടപ്പിക്കുകയും നെഞ്ചിടിപ്പിക്കുകയും ചെയ്യുന്ന സൗണ്ട് ബോക്സുകളൂടെ ശേഖരവുമായാണിപ്പോള് തെരുവുകളിലൂടെ പ്രചരണ വാഹനങ്ങള് ഇഴയുന്നത്. ഓടുന്ന വാഹനത്തില് അനൗണ്സ്മെന്റുകള് പാടില്ലെന്നാണ് നിയമമെങ്കിലും ഇത് രാഷ്ടീയക്കാര് പാലിക്കാറില്ല എന്നതാണ് വസ്തുത.
