കൊച്ചി: മുഖ്യമന്ത്രിയുടെ ദുരിതാശ്വാസ നിധിയിലേക്ക് സര്ക്കാര് ജീവനക്കാര് ഒരു മാസത്തെ ശമ്പളം സംഭാവന ചെയ്യണമെന്ന സാലറി ചലഞ്ച് ഉത്തരവിനോടു സഹകരിക്കാത്തവര് വിസമ്മത പത്രം നല്കണമെന്ന വ്യവസ്ഥ ഹൈക്കോടതി സ്റ്റേ ചെയ്തു. സര്ക്കാരിന് കടുത്ത തിരിച്ചടിയാണ് കോടതിവിധി.
കേരള എന്ജിഒ സംഘ് നല്കിയ അപ്പീലിലാണ് ഡിവിഷന് ബെഞ്ചിന്റെ നടപടി. സാലറി ചലഞ്ചിനെതിരെ ഹര്ജിക്കാര് കേരള അഡ്മിനിസ്ട്രേറ്റീവ് ട്രൈബ്യൂണലില് (കെഎടി) ഹര്ജി നല്കിയിരുന്നെങ്കിലും വിവാദ ഉത്തരവ് സ്റ്റേ ചെയ്യാന് ട്രൈബ്യൂണല് വിസമ്മതിച്ചു. തുടര്ന്നാണ് എന്ജിഒ സംഘ് അപ്പീല് നല്കിയത്.
സാലറി ചലഞ്ചിനെ അനുകൂലിച്ച് ഹര്ജിയില് കക്ഷി ചേരാനെത്തിയ എന്ജിഒ യൂണിയനെ ഹൈക്കോടതി വിമര്ശിച്ചു. ഹര്ജിയിലെ ആരോപണങ്ങള് അവാസ്തവമാണെന്നും പൊതുജന താല്പ്പര്യം മുന്നിറുത്തിയാണ് സാലറി ചലഞ്ച് നടപ്പാക്കുന്നതെന്നുമായിരുന്നു എന്ജിഒ യൂണിയന്റെ വാദം. നിങ്ങള്ക്ക് സംഭാവന നല്കണമെന്നുണ്ടെങ്കില് നല്കാമെന്നും മറ്റുള്ളവരെ നിര്ബന്ധിക്കുന്നതെന്തിനാണെന്നും ഹൈക്കോടതി വാക്കാല് ചോദിച്ചു.
ട്രൈബ്യൂണല് ഹര്ജി ഒരു മാസത്തിനുള്ളില് തീര്പ്പാക്കണമെന്നും അല്ലെങ്കില് ഇടക്കാല ആവശ്യങ്ങള് പരിഗണിക്കണമെന്നും വിധിയില് പറയുന്നു. ശമ്പളം നല്കാന് താല്പ്പര്യമില്ലാത്ത ജീവനക്കാര് വിസമ്മതപത്രം നല്കണമെന്ന വ്യവസ്ഥ നിര്ബന്ധിത പിരിവിന്റെ സ്വഭാവത്തിലുള്ളതാണെന്ന് പ്രഥമദൃഷ്ട്യാ വ്യക്തമാണെന്ന് ഹൈക്കോടതി വിലയിരുത്തി. ജീവനക്കാര്ക്ക് സാമ്പത്തിക സ്ഥിതിയനുസരിച്ച് ഇഷ്ടാനുസരണം ദുരിതാശ്വാസ നിധിയിലേക്ക് സംഭാവന നല്കാന് വിധി തടസ്സമല്ലെന്നും ഹൈക്കോടതി വ്യക്തമാക്കി.
വിസമ്മതപത്രം നല്കണമെന്ന വ്യവസ്ഥ സംഭാവന നല്കാന് തയാറല്ലാത്ത ജീവനക്കാരെ കുറ്റക്കാരായി ചിത്രീകരിക്കുന്നതാണെന്നും ജീവനക്കാരെ രണ്ട് തട്ടിലാക്കുന്നതാണെന്നും ഹര്ജിക്കാര് വാദിച്ചു. വിസമ്മതപത്രം, പല കാരണങ്ങളാല് ശമ്പളം നല്കാനാവാത്ത ജീവനക്കാരുടെ ആത്മാഭിമാനത്തെ വ്രണപ്പെടുത്തും.
നിര്ബന്ധിത പിരിവ് നടത്തുന്നില്ലെന്നും ഇതുറപ്പാക്കാന് ചീഫ് സെക്രട്ടറി ഉത്തരവ് നല്കിയിട്ടുണ്ടെന്നും അഡ്വക്കേറ്റ് ജനറല് വാദിച്ചു. അങ്ങനെയെങ്കില് വിസമ്മതപത്രം നല്കാത്തവരുടെ ശമ്പളം പിടിക്കുമോയെന്ന് കോടതി ആരാഞ്ഞു. ഇവരുടെ ശമ്പളം തവണ വ്യവസ്ഥയില് പിടിക്കുമെന്നായിരുന്നു സര്ക്കാരിന്റെ മറുപടി. എന്നാല് പല കാരണങ്ങളാല് ശമ്പളം നല്കാനാവാത്തവരില് നിന്ന് വിസമ്മതപത്രം തേടുന്നത് അവരുടെ ആത്മാഭിമാനത്തെ ബാധിക്കുമെന്ന് ഡിവിഷന് ബെഞ്ച് വിലയിരുത്തി. ആത്മാഭിമാനമില്ലാതെ ജീവിക്കേണ്ടി വരുന്നതിനേക്കാള് നല്ലത് ആയിരം തവണ മരിക്കുന്നതാണെന്ന ഫ്രഞ്ച് തത്ത്വചിന്തകന്റെ വാക്കുകളും കോടതി കൂട്ടിച്ചേര്ത്തു.
സാലറി ചലഞ്ചിനെതിരെ കെഎടിയില് ഹര്ജി നിലവിലുണ്ട്. വിസമ്മതപത്രം നിര്ബന്ധമാക്കിയ വ്യവസ്ഥ മാത്രമാണ് ഡിവിഷന് ബെഞ്ച് പരിഗണിച്ചത്. കെഎടിയില് നിലവിലിരിക്കുന്ന കേസിനെ ബാധിക്കുമെന്നതിനാല് കടുത്ത പരാമര്ശങ്ങള് ഒഴിവാക്കുകയാണെന്നും ഹൈക്കോടതി അഭിപ്രായപ്പെട്ടു. തുടര്ന്ന് ഹര്ജിയിലെ തുടര് നടപടികള് അവസാനിപ്പിക്കുകയായിരുന്നു.
