കൊച്ചി: ബിഷപ്പ് ഫ്രാങ്കോയെ അറസ്റ്റ് ചെയ്യണമെന്നാവശ്യപ്പെട്ട് സമരം ചെയ്ത കന്യാസ്ത്രീകള്‍ക്കും ഐക്യദാര്‍ഢ്യം പ്രഖ്യാപിച്ച മറ്റു സഭാംഗങ്ങള്‍ക്കെതിരെ പ്രതികാരനടപടിയുമായി മുന്നോട്ടുപോകുന്ന നിലപാടിനെതിരെ പ്രക്ഷോഭം ശക്തമാക്കാനൊരുങ്ങി സേവ് ഔവര്‍ സിസ്റ്റേഴ്സ് സമരസമിതി. സമരത്തെ അനുകൂലിച്ചവര്‍ക്കെതിരെ നടപടിയുണ്ടാകാനുള്ള സാധ്യത മുന്‍കൂട്ടി കണ്ടിരുന്നു.
സമരത്തില്‍ പങ്കെടുത്ത സിസ്റ്റര്‍ ലൂസിക്കെതിരെ പ്രതികാര നടപടികള്‍ തുടങ്ങിക്കഴിഞ്ഞു എന്ന വാര്‍ത്ത ഖേദകരമാണ്. എന്നാല്‍ ഇത്തരത്തിലുള്ള നടപടികളുമായിട്ടാണ് സഭ മുന്നോട്ടുപോകുന്നതെങ്കില്‍ വളരെ ശക്തമായ സമരപരമ്പരകള്‍ക്ക് വീണ്ടും കേരളം സാക്ഷ്യം വഹിക്കേണ്ടി വരും, സമരസമിതി കണ്‍വീനര്‍ ഫാ. അഗസ്റ്റിന്‍ വട്ടോളി വ്യക്തമാക്കി. എറണാകുളത്ത് ഹൈക്കോര്‍ട്ട് ജങ്ഷനിലെ സമരം അവസാനിപ്പിച്ചതിനു ശേഷമുള്ള നടപടികള്‍ ചര്‍ച്ച ചെയ്യാന്‍ ചേര്‍ന്ന യോഗത്തിനു ശേഷം മാധ്യമപ്രവര്‍ത്തകരോട് സംസാരിക്കുകയായിരുന്നു അദ്ദേഹം.
കന്യാസ്ത്രീകള്‍ക്ക് നീതി ലഭിക്കും വരെ പോരാട്ടം തുടരാന്‍ യോഗം തീരുമാനിച്ചു. സ്ത്രീകളുടെ നേതൃത്വത്തില്‍ എല്ലാ ജില്ലകളിലും ഐക്യദാര്‍ഢ്യ സമതികള്‍ രൂപീകരിക്കും.
ഒക്ടോബര്‍ രണ്ടിന് എറണാകുളത്ത് ലാലന്‍ ടവറില്‍ വനിതാകണ്‍വെന്‍ഷന്‍ സംഘടിപ്പിക്കും. സിസ്റ്റര്‍ ടീന, സിസ്റ്റര്‍ ഇമല്‍ഡ തുടങ്ങി വിവിധ ഭാഗങ്ങളില്‍നിന്നുള്ള പ്രവര്‍ത്തകരും സമരസമിതി ഭാരവാഹികളും യോഗത്തില്‍ പങ്കെടുത്തു.
