കോട്ടയം: ചങ്ങനാശ്ശേരിയില് പോലീസ് ചോദ്യം ചെയ്ത ശേഷം വിട്ടയച്ച ദമ്പതിമാർ ആത്മഹത്യ ചെയ്ത സംഭവത്തില് ആത്മഹത്യാക്കുറിപ്പ് പോലീസ് കണ്ടെടുത്തു. ചങ്ങനാശ്ശേരി പുഴവാത് ഇല്ലംപള്ളി വീട്ടില് സുനില്, രേഷ്മ എന്നിവരെയാണ് ബുധനാഴ്ച സയനൈഡ് കഴിച്ച് ആത്മഹത്യ ചെയ്ത നിലയില് കണ്ടെത്തിയത്.
രേഷ്മ എഴുതിയെന്നു കരുതുന്ന കുറിപ്പാണ് കണ്ടെത്തിയിട്ടുള്ളത്. കത്തിലെ പ്രധാന പരാമര്ശങ്ങള് ഇവയാണ്: ‘സ്വര്ണം മോഷ്ടിച്ചെന്ന് പോലീസ് മര്ദിച്ച് എഴുതി വാങ്ങുകയായിരുന്നു. ആത്മഹത്യയ്ക്കു കാരണം ചങ്ങനാശ്ശേരി നഗരസഭാ സി പി എം കൗണ്സിലര് സജികുമാറാണ്. വീട് നിര്മാണവുമായി ബന്ധപ്പെട്ട് സജികുമാര് തന്നെയാണ് സ്വര്ണം വിറ്റത്. 100 ഗ്രാം സ്വര്ണം മാത്രമേ തങ്ങളുടെ ഭാഗത്തുനിന്ന് നഷ്ടപ്പെട്ടിട്ടുള്ളു. എന്നാല് 600 ഗ്രാം സ്വര്ണം എടുത്തുവെന്ന് പോലീസ് മര്ദിച്ച് മൊഴിയെടുക്കുകയായിരുന്നു. അതിനാലാണ് ആത്മഹത്യയിലേക്ക് പോകുന്നത്’.
സ്വര്ണം നഷ്ടപ്പെട്ടെന്ന സി പി എം നഗരസഭാംഗത്തിന്റെ പരാതിയില് ഇവരെ കഴിഞ്ഞദിവസം പോലീസ് ചോദ്യം ചെയ്തിരുന്നു. അതേ സമയം സംഭവത്തിൽ പ്രതിഷേധിച്ച് യു ഡി എഫും ബി ജെ പിയും ഇന്ന് ചങ്ങനാശ്ശേരിയില് ഹര്ത്താലിന് ആഹ്വാനം ചെയ്തിട്ടുണ്ട്. രാവലെ ആറുമുതല് വൈകീട്ട് ആറുവരെയാണ് ഹര്ത്താല് പ്രഖ്യാപിച്ചിരിക്കുന്നത്.
പ്രതികരിക്കാൻ ഇവിടെ എഴുതുക: