ചെങ്ങന്നൂര്: ചെങ്ങന്നൂര് റെയില്വേ സ്റ്റേഷനെ രാജ്യാന്തര നിലവാരത്തിലേക്ക് ഉയര്ത്തുമെന്ന് കേന്ദ്രമന്ത്രി അല്ഫോണ്സ് കണ്ണന്താനം. ഇതിന് 100 കോടിയുടെ പദ്ധതി നടപ്പാക്കും. ആദ്യഘട്ടത്തില് അയ്യപ്പഭക്തന്മാര്ക്കുള്ള സൗകര്യമായിരിക്കും ഒരുക്കുന്നത്. ചെങ്ങന്നൂര് റെയില്വേ സ്റ്റേഷനില് മാധ്യമപ്രവര്ത്തകരോട് സംസാരിക്കുകയായിരുന്നു അദ്ദേഹം.
രാജ്യത്തെത്തിയ വിദേശ ടൂറിസ്റ്റുകളുടെ എണ്ണം ചരിത്രത്തില് ആദ്യമായി ഒരു കോടി കവിഞ്ഞു. ഇതില് നിന്നുള്ള വരുമാനം 1,80,000 കോടി രൂപയാണ്. ജിഡിപിയുടെ 6.88 ശതമാനം ടൂറിസത്തിന്റെ സംഭാവനയാണ്. രാജ്യത്ത് ഉത്പാദിപ്പിക്കപ്പെടുന്ന തൊഴിലുകളുടെ 12.36 ശതമാനം വിനോദ സഞ്ചാര മേഖയിലാണ്.
മൂന്നുവര്ഷം കൊണ്ട് വിദേശ ടൂറിസ്റ്റുകളുടെ എണ്ണം ഇരട്ടിയാക്കാനാണ് ലക്ഷ്യം. ഇതിന് രാത്രികാല ടൂറിസം പ്രോത്സാഹിപ്പിക്കും. ടൂറിസത്തിലും ഐടിയിലും ശ്രദ്ധ കേന്ദ്രീകരിച്ചാല് കേരളത്തിലെ തൊഴിലില്ലായ്മ ഒരു പരിധി വരെ പരിഹരിക്കാനാകും. ചെങ്ങന്നൂര് ഉപതെരഞ്ഞെടുപ്പ് എത്രയും പെട്ടെന്ന് നടത്തണമെന്നാണ് ബിജെപിയുടെ അഭിപ്രായമെന്നും അദ്ദേഹം പറഞ്ഞു.
