അരിസോണ: ഡ്രൈവറില്ലാ യൂബർ ടാക്സികളെ അമേരിക്കൻ സംസ്ഥാനമായ അരിസോണയിൽ താത്കാലികമായി നിരോധിച്ചു. കഴിഞ്ഞയാഴ്ച റോഡ് യാത്രക്കാരി ഡ്രൈവറില്ലാ യൂബർ ടാക്സി ഇടിച്ച് കൊല്ലപ്പെട്ടിരുന്നു. ഇതിന്റെ പശ്ചാത്തലത്തിലാണ് ഗവർണർ ഇത്തരത്തിലൊരു തീരുമാനം കൈക്കൊണ്ടത്.
നിരോധനം വ്യക്തമാക്കിക്കൊണ്ടുള്ള കത്ത് അരിസോണ ഗവർണർ യൂബർ ടാക്സി സിഇഒയ്ക്ക് അയക്കുകയും ചെയ്തു. പൊതുജനങ്ങളുടെ ജീവനാണ് ഏറ്റവും കൂടുതൽ വിലകൊടുക്കുന്നതെന്നാണ് ഗവർണർ കത്തിൽ പരാമർശിച്ചിരിക്കുന്നത്. മാർച്ച് 18ന് ഉണ്ടായ അപകടത്തിൽ റോഡ് കുറുകെ മുറിച്ച് നടന്ന യാത്രക്കാരി യൂബർ ടാക്സി ഇടിച്ച് കൊല്ലപ്പെടുകയായിരുന്നു. ഇതിന്റെ ദൃശ്യങ്ങൾ പുറത്ത് വന്നിരുന്നു.
2016ലാണ് അരിസോണയിൽ ഡ്രൈവറില്ലാ കാറുകൾ പ്രവർത്തനം തുടങ്ങിയത്. അമേരിക്കയിലെ ടെമ്പി, പിസ്റ്റ്സ്ബർഗ്, സാൻഫ്രാൻസിസ്കോ, കാനഡയിലെ ടൊറൊൻ്റോ എന്നിവിടങ്ങളിൽ ഡ്രൈവറില്ലാ കാറുകൾ പ്രവർത്തിക്കുന്നുണ്ട്. വഴിയാത്രക്കാരി കൊല്ലപ്പെട്ട സാഹചര്യത്തിൽ ഇത്തരം കാറുകളുടെ സംവിധാനം പുനപരിശോധിക്കണമെന്ന ആവശ്യം ശക്തമായിരിക്കുകയാണ്.
