തിരുവനന്തപുരം: ഈ സാമ്പത്തിക വര്ഷം വിമാനത്താവളങ്ങളിലൂടെ കടത്താന് ശ്രമിച്ച 14.5 കോടി രൂപയുടെ സ്വര്ണം പിടിച്ചതായി കസ്റ്റംസ് കമ്മിഷണര് സുമിത് കുമാര് അറിയിച്ചു. കോഴിക്കോട് വിമാനത്താവളം വഴി 57 കേസുകളിലായി 10.94 കോടിയുടെ സ്വര്ണം പിടിച്ചു. തിരുവനന്തപുരം വിമാനത്താവളം വഴി 4.44 കോടി വില വരുന്ന 13.56 കിലോ സ്വര്ണവും. തിരുവനന്തപുരം വിമാനത്താവളം വഴി 15.53 ലക്ഷം രൂപയുടെ വിദേശ കറന്സി, 600 ഗ്രാം മയക്കുമരുന്ന്, 34.34 ലക്ഷത്തിന്റെ 18,7 കിലോഗ്രാം വരുന്ന കുങ്കുമപ്പൂ, 36.85 ലക്ഷം രൂപയുടെ വിദേശ സിഗരറ്റ് എന്നിവയും പിടികൂടിയിരുന്നു. കോഴിക്കോട് വിമാനത്താവളം വഴി കടത്തിയ 11.77 കോടിയുടെ സാധനങ്ങള് പിടികൂടിയിട്ടുണ്ട്. തിരുവനന്തപുരം എയര് കാര്ഗോ വഴി 84 കേസുകളിലായി 25.86 ലക്ഷം രൂപയുടെ ഡ്യൂട്ടി ഈടാക്കി.
കള്ളക്കടത്ത് അടക്കമുള്ള രാജ്യദ്രോഹ പ്രവര്ത്തനങ്ങളെക്കുറിച്ച് വിവരം ലഭിക്കുന്നവര് കസ്റ്റംസിനെ അറിയിക്കണമെന്ന് കമ്മിഷണര് അഭ്യര്ഥിച്ചു. ഇവര് തെളിവ് നല്കാനായി കോടതി കയറിയിറങ്ങണമെന്നത് തെറ്റായ പ്രചാരണമാണ്. ഇവരുടെ വിവരങ്ങള് രഹസ്യമായി വയ്ക്കും.
കമ്മിഷണറുടെ 9711704410 എന്ന നമ്പറിലോ 0484 2870400, 2354056 ഓഫീസ് നമ്പറുകളിലോ വിളിച്ചാല് മതി. സ്വര്ണം കൊണ്ടുവരുമ്പോള് ഡ്യൂട്ടി വെട്ടിച്ചാല് വന് സാമ്പത്തിക ലാഭ ഉണ്ടാവുമെന്നതിനാല് പലരും വാഹകരാവുന്നുണ്ട്. പിടിക്കപ്പെടുന്നവര് കടുത്ത ശിക്ഷ നേരിടണം. ആറ് മാസം വരെ വിദേശത്ത് കഴിഞ്ഞവര്ക്ക് സാധാരണ ഗതിയില് ഒരു കിലോഗ്രാം സ്വര്ണം ഡ്യൂട്ടി അടച്ചുകൊണ്ടുവരാം.
പ്രതികരിക്കാൻ ഇവിടെ എഴുതുക: