കണ്ണൂര്: മുഖ്യമന്ത്രി പിണറായി വിജയനെ വധിക്കുമെന്ന് ഫോണിലൂടെ ഭീഷണി മുഴക്കിയാളെ പോലീസ് അറസ്റ്റു ചെയ്തു. ഇയാളെ ചോദ്യം ചെയ്തു വരികയാണ്. ശനിയാഴ്ച ഉച്ചയോടെ സിപിഎം കണ്ണൂര് ജില്ലാ സെക്രട്ടറി പി. ജയരാജന്റെ ഫോണിലേക്കാണ് ഭീഷണി സന്ദേശം എത്തിയത്.
ഒരു ദിവസത്തിനകം മുഖ്യമന്ത്രിയെ വധിക്കുമെന്നായിരുന്നു ഭീഷണി. സന്ദേശമെത്തുമ്പോള് മുഖ്യമന്ത്രി ചെന്നൈയില് അപ്പോളോ ആശുപത്രിയില് ചികിത്സയിലായിരുന്നു. രഹസ്യാന്വേഷണ വിഭാഗം ഉടന് തമിഴ്നാട് ക്യൂബ്രാഞ്ചുമായി ബന്ധപ്പെടുകയും ആശുപത്രിയില് മുഖ്യമന്ത്രിയുടെ സുരക്ഷ ശക്തമാക്കുകയും ചെയ്തു.
സൈബര് സെല് നടത്തിയ അന്വേഷണത്തില് കണ്ണൂരില് നിന്നാണ് ഫോണ് സന്ദേശം വന്നതെന്ന് കണ്ടെത്തി. സിം കാര്ഡിന്റെ ഉടമസ്ഥ ഒരു പെണ്കുട്ടിയായിരുന്നു. യുവതിയുമായി ബന്ധപ്പെട്ടപ്പോള് തന്റെ നഷ്ടപ്പെട്ടു പോയ സിം കാര്ഡാണിതെന്ന വിവരം ലഭിച്ചു. തുടര്ന്ന് നടത്തിയ അന്വേഷണത്തിലാണ് പ്രതി കുടുങ്ങിയത്.
