ഹൈന്ദവ വിശ്വാസത്തെ അപഹസിച്ചുകൊണ്ടിരിക്കുന്ന കുരീപ്പുഴ ശ്രീകുമാറിനെപ്പോലുള്ള അല്പജ്ഞാനികളുടെ ശ്രദ്ധയ്ക്ക്. പൊരുളോ വ്യാപ്തിയോ മനസ്സിലാക്കാതെ ഹിന്ദുമതത്തിന്റെ വിശ്വാസങ്ങളെക്കുറിച്ചും ആരാധനാ ക്രമങ്ങളെക്കുറിച്ചും അസംബന്ധങ്ങള് എഴുന്നള്ളിക്കരുത്. ഹിന്ദുവിശ്വാസം പൂര്ണ്ണമായതും കുറ്റമറ്റതാണെന്ന് മനസ്സിലാക്കാന് നിങ്ങള് വളര്ന്നതും വളര്ത്തിയതുമായ സാഹചര്യത്തില് അസാധ്യമായിരുന്നിരിക്കാം.
സര്വ്വപ്രപഞ്ചത്തിനേയും ആധാരമാക്കിയുള്ളതാണ് ബ്രഹ്മ വിഷ്ണു മഹേശ്വരന്മാരായ ത്രിമൂര്ത്തികളെ ആരാധിക്കുന്ന ഹിന്ദുക്കളുടെ രീതി.‘മഹാവിഷ്ണുവിനെ അനന്തമായ ഈ പ്രപഞ്ചത്തില് കാണുന്ന സര്വ്വതിന്റെയും ശക്തിയായി ചിത്രീകരിച്ചിരിക്കുന്നു. നിലനില്പ്പിനാധാരമായ പഞ്ചഭൂതങ്ങളെ ചൊരിയുന്ന പൃഥ്വി, അപ്, തേജസ്, വായു, ആകാശം എന്നിങ്ങനെ അഞ്ച് തലയുള്ള സര്പ്പമായി സങ്കല്പ്പിച്ചിരിക്കുന്നു. ജലത്തെ സൃഷ്ടിച്ചത് നരന് എന്ന് പേരോടുകൂടിയ പരമാത്മാവ്. അതിനാല് ജലത്തിന് നാരം എന്ന പേര് ലഭിച്ചു. ആ നാരത്തില് വസിക്കുന്നതിനാലാണ് ആ പരമാത്മാവിന് നാരായണന് എന്ന പേര് ലഭിച്ചത്.
ഈ ശക്തിയുടെ പൊക്കിള്ക്കൊടിയില്നിന്ന് ഉത്ഭവിക്കുന്ന മനോഹര പുഷ്പമായി താമരയെ സങ്കല്പ്പിച്ചിരിക്കുന്നു. അതില്നിന്ന് സൃഷ്ടിക്കുന്നവയെ ഒരമ്മ പൊക്കിള്ക്കൊടി വഴി, ഉത്ഭവിക്കുന്ന ജീവാത്മാവിനെ ജീവന് നല്കി പ്രാപ്തയാക്കുന്നതുപോലെ സംരക്ഷിക്കുന്നു. ഇത്ര അര്ത്ഥസമ്പുഷ്ടമായ ഭാവനാ വൈഭവം മറ്റാര്ക്കുണ്ട്?തുടക്കമോ നടുവോ ഒടുക്കമോ കാണാനില്ലാത്തവനും, പ്രപഞ്ചം മുഴുവന് എണ്ണമറ്റ കാലും കൈയും വ്യാപിപ്പിച്ചിരിക്കുന്നവനും (സാന്നിദ്ധ്യമുള്ളവനും) ഈ ജഗത്തിനെ തന്റെ തേജസ്സുകൊണ്ട് തപിപ്പിക്കുന്നവനും വിശ്വരൂപനുമായ അങ്ങയെ ഞാന് കാണുന്നു എന്ന് ഭഗവദ്ഗീത പറയുന്നു.
സര്വവ്യാപിയായ ബ്രഹ്മത്തിന്റെ ലീനമായ ശക്തി ചലിക്കാന് ഇച്ഛിക്കുമ്പോള്, ആ ശക്തി പ്രകടമാകാന് തുടങ്ങുമ്പോള് ബോധം (ശിവം) ശക്തിയുടെ ഭാഗമായും, ശക്തി ശിവന്റെ ഭാഗമായും ആവിഷ്ക്കരിക്കാന് തുടങ്ങുന്നു. ആവിഷ്ക്കാര വ്യാപന പ്രക്രിയയ്ക്കും മുമ്പുള്ള ഈ അവസ്ഥയില് ബോധവും ശക്തിയും വേര്തിരിക്കപ്പെടാത്ത അവസ്ഥ. ശിവശക്തൈ്യക്യരൂപമായിരിക്കുന്ന, പരസ്പരം ലീനമായിരിക്കുന്ന അവസ്ഥ. ഇതിനെ അര്ദ്ധനാരീശ്വര സങ്കല്പ്പത്തില്ക്കൂടി ഹിന്ദുക്കള് ആരാധിക്കുന്നു, സങ്കല്പ്പപൂര്ത്തീകരണം നടത്തുന്നു. അല്ലാതെ സന്താനോല്പ്പാദന ലക്ഷ്യമല്ല ഈ ആകൃതിയുടെ ഭാവന. നവീനശാസ്ത്രമനുസരിച്ചുള്ള സെന്ട്രല് പെറ്റല് ഫോഴ്സ്, ഫ്യൂഗല് ഫോഴ്സ് എന്നിവയെക്കുറിച്ച് ഇവിടെ വിശദീകരിക്കുന്നില്ല.
ജി. മോഹനന് നായര്,
കായംകുളം
