ബാഗ്ദാദ്: ഭീകര പ്രവര്ത്തനത്തിന് ഇസ്ലാമിക് സ്റ്റേറ്റില് ചേര്ന്ന തുര്ക്കി വനിതയെ തൂക്കിക്കൊല്ലാന് ഇറാഖ് കോടതിവിധി. വിവിധ രാജ്യക്കാരായ 11 സ്ത്രീകള്ക്ക് ജീവപര്യന്തം തടവും വിധിച്ചു. സ്ത്രീകള്ക്ക് മേല്ക്കോടതിയില് അപ്പീല് പോകാം. എന്നാല് ഇതാദ്യമായാണ് ഭീകര സംഘടനയില് ചേര്ന്നതിന് വധശിക്ഷ; അതും സ്ത്രീയ്ക്ക്.
ഭര്ത്താക്കന്മാര് നിര്ബന്ധിച്ചതുകൊണ്ടാണ് ഇസ്ലാമിക് സ്റ്റേറ്റില് ചേര്ന്നതെന്ന സ്ത്രീകളുടെ വാദം കോടതി തള്ളി. ഇറാഖിലെ മൊസ്യൂളില്നിന്നോ താളില്നിന്നോ ആണ് ഇവരെ അറസ്റ്റ് ചെയ്തത്. ഇവരുടെ ഭര്ത്താക്കന്മാര് ഭീകരരും സൈനികരുമായുള്ള യുദ്ധത്തില് കൊല്ലപ്പെട്ടതാണ്.
കേസില് ശിക്ഷിക്കപ്പെട്ട അസര്ബൈജാന് സ്വദേശിനി ആങ്ങീ ഒമ്രാനെ പറഞ്ഞതിങ്ങനെ: ”ഇന്റര്നെറ്റ്വഴി പരിചയപ്പെട്ടാണ് ഭര്ത്താവിനെ കിട്ടിയത്. തുര്ക്കിയിലേക്കെന്നു പറഞ്ഞാണെത്തിയത്. പക്ഷേ സിറിയയിലും പിന്നീട് ഇറാഖിലേക്കും കൊണ്ടുപോരികയായിരുന്നു.”
തുര്ക്കിക്കാരിയായ ലൈല പറഞ്ഞത് ഇങ്ങനെ: ഭര്ത്താവ് എന്നെ നിര്ബന്ധിച്ച് ഇറാഖിലെത്തിക്കുകയായിരുന്നു. അനുസരിച്ചില്ലെങ്കില് രണ്ടര വയസുള്ള കുഞ്ഞിനെയും കൊണ്ട് കടന്നുകളയുമെന്ന് പറഞ്ഞു. ഞാന് ഇതുവരെ ഒരു ആക്രമണങ്ങള്ക്കും കൂട്ടു നിന്നിട്ടില്ല, വീട്ടിനുള്ളില് കഴിഞ്ഞിട്ടേ ഉള്ളു.”
