പത്തനാപുരം: ഗ്രാമീണമേഖലകളില് ജനങ്ങള് അധികവും കുടിവെള്ളത്തിനായി ആശ്രയിച്ചിരുന്ന പഞ്ചായത്ത് കിണറുകള് ഇന്ന് സംരക്ഷിക്കാനാളില്ലാതെ നാശത്തിന്റെ വക്കില്.
പത്തനാപുരം ഗ്രാമപഞ്ചായത്തിലെ 19 വാര്ഡുകളിലായി എഴുപതോളം പൊതുകിണറുകളാണുള്ളത്. ഇതില് അധികവും മാലിന്യം നിക്ഷേപിച്ചും കാടുമൂടിയും തകര്ന്ന സ്ഥിതിയിലാണ്. പാതിരിക്കല്, ഇടത്തറ, മാങ്കോട്, കുണ്ടയം തുടങ്ങിയ സ്ഥലങ്ങളില് നാട്ടുകാര്ക്ക് ഉപയോഗപ്രദമായിരുന്ന കിണറുകളില് അറവുമാടുകളുടെയും ഇറച്ചി കോഴികളുടെയും അവശിഷ്ടങ്ങള് തള്ളി ജനദ്രോഹ നടപടികളാണ് സാമൂഹ്യവിരുദ്ധര് ചെയ്യുന്നത്. കടുത്ത വേനലിലും വറ്റാത്ത കിണറുകളാണ് പഞ്ചായത്ത് കിണറുകള്.
മുന്വര്ഷങ്ങളിലുണ്ടായ ശക്തമായ വേനലില് മിക്ക വീടുകളിലെയും കിണറുകള് വറ്റിവരണ്ട് ജലക്ഷാമം രൂക്ഷമായ ഘട്ടത്തില് ഗ്രാമവാസികള് ചേര്ന്ന് ചില കിണറുകള് ശുദ്ധിയാക്കി ഉപയോഗപ്രദമാക്കിയിരുന്നു. മുന്പ് വര്ഷാവര്ഷങ്ങളില് പഞ്ചായത്ത് കിണറുകള് ശുചീകരിച്ച് സംരക്ഷിക്കുമായിരുന്നു. ഇന്ന് പഞ്ചായത്ത് മുഖേന ശുചീകരണമോ സംരക്ഷണമോ നടത്തുന്നില്ല.
കുടിവെള്ള സംരംക്ഷണത്തിനായി സര്ക്കാര് കോടികള് ചിലവഴിക്കുമ്പോള് ഇത്തരത്തിലുള്ള ജലസ്രോതസ്സുകള് സംരക്ഷിക്കാന് അധികൃതര് നടപടികള് സ്വീകരിക്കുന്നില്ലെന്നും ആക്ഷേപമുണ്ട്. തൊഴിലുറപ്പ് പദ്ധതിയില് ഉള്പ്പെടുത്തി പൊതുകിണറുകള് സംരക്ഷിക്കാന് നടപടി സ്വീകരിക്കണമെന്നാണ് പൊതുവായ ആവശ്യം.
