കണ്ണൂര്: അരിയില് ഷുക്കൂര് വധത്തില് സിപിഎമ്മിന്റെ പങ്ക് വെളിപ്പെടുത്തി പാര്ട്ടി എംഎല്എ എ.എന് ഷംസീര്. ഷുക്കൂര് വധത്തില് പാര്ട്ടിക്ക് പങ്കില്ലെന്ന് പറഞ്ഞിട്ടില്ല. അതങ്ങനെ സംഭവിച്ച് പോയതാണെന്നാണ് ഷംസീറിന്റെ വെളിപ്പെടുത്തല്. ടിവി ചാനല് ചര്ച്ചയിലായിരുന്നു ഷംസീര് ഇക്കാര്യം പറഞ്ഞത്.
ഷുക്കൂര് വധം പാര്ട്ടിയുടെയോ പാര്ട്ടി പ്രവര്ത്തകര്ക്കരുടെയും തലയില് ചാരാന് നോക്കേണ്ടെന്ന് ആവര്ത്തിച്ച് പറഞ്ഞുകൊണ്ടിരിക്കുന്നവരാണ് സിപിഎം നേതാക്കള്. ഈ നിലപാടിനെ തള്ളിയാണ് ഷംസീറിന്റെ വെളിപ്പെടുത്തല്. ഷുഹൈബ് വധത്തിലുള്ള ചര്ച്ചയിലായിരുന്നു ഷംസീര് വിവാദ വെളിപ്പെടുത്തല് നടത്തിയത്. ഷുക്കൂറിന്റേത് പ്ലാന്ഡ് മര്ഡര് അല്ല. അതങ്ങ് സംഭവിച്ച് പോയതാണ്. കൊലപാതകം എന്ന് പറയുന്നത് തന്നെ ഒരു മാസ് സൈക്കോളജിയാണ്. ഷൂക്കൂര് കേസില് ഞങ്ങള്ക്ക് ബന്ധമില്ലെന്ന് പറഞ്ഞിട്ടേയില്ല. ജനക്കൂട്ടത്തിന്റെ ആക്രമണത്തിലാണ് ഷൂക്കൂര് മരിച്ചത്. അതില് പാര്ട്ടിക്കാരുണ്ട്. അതുകൊണ്ടാണ് ഞങ്ങളതിനെ ന്യായീകരിക്കാന് വരാത്തത്. ആ സംഭവത്തില് ഞങ്ങള്ക്കും പങ്കുണ്ടെന്നുമായിരുന്നു ഷംസീറിന്റെ പ്രസ്താവന.
ഷംസീറിന്റെ പ്രസ്താവന നിയമവാഴ്ച്ചയോടുള്ള വെല്ലുവിളിയാണെന്ന് മുസ്ലീം യൂത്ത് ലീഗ് സംസ്ഥാന ജനറല് സെക്രട്ടറി പികെ ഫിറോസ് പറഞ്ഞു. കൊലപാതകത്തില് സിപിഎമ്മിന്റെ ഉന്നത നേതാക്കള്ക്കുള്ള പങ്ക് ഷംസീറിനെ ചോദ്യം ചെയ്താല് പുറത്തുവരും. ഇക്കാര്യം ആവശ്യപ്പെട്ട് സിബിഐ സമീപിക്കും. ഇതിനായി ഷംസീറിന്റെ പ്രസ്താവനയുടെ സിഡിയും സിബിഐക്ക് നല്കും. കൊല നടത്തിയവരെ കുറിച്ച് ഷംസീറിന് കൃത്യമായ ധാരണയുണ്ടെന്നാണ് പരാമര്ശത്തിലൂടെ മനസിലാവുന്നതെന്ന് ഫിറോസ് പറഞ്ഞു.
കണ്ണൂര് ജില്ലയില് നടന്നിട്ടുള്ള കൊലപാതകങ്ങളില് ഏറ്റവും ക്രൂരമായിരുന്നു ഷുക്കൂറിന്റേത്. രണ്ട് മണിക്കൂറിലധികം ഷുക്കൂറിനെ തടഞ്ഞ് വെച്ച് വിചാരണ ചെയ്ത ശേഷമാണ് കൊലപ്പെടുത്തിയത്.
