കൊച്ചി: ‘ടെലിവിഷനില് കാല്പന്തുകളി ആസ്വദിക്കുന്നവരെ ആവേശത്തിന്റെ കൊടുമുടിയേറ്റുന്ന ഷൈജു ദാമോദരന് കമന്റിറിയില് ഡബിള് സെഞ്ചറി. ഇന്നലെ ബംഗളൂരു എഫ്.സി-എഫ്.സി ഗോവ പോരാട്ടത്തിന് തത്സമയം കളി പറഞ്ഞാണ് ഷൈജു കമന്ററിയില് 200 തികച്ചത്. ഐ.എസ്.എല്ലിന്റെ ആദ്യ സീസണ് മുതല് കമന്റേറ്ററായി ഏഷ്യാനെറ്റ് മൂവിസിലുണ്ട്. ഇതുവരെ പൂര്ത്തിയായ
250 മത്സരങ്ങളില് ഇരുനൂറിലും ഷൈജു കളി പറഞ്ഞു. ആദ്യ സീസണില് 47 മത്സരങ്ങളിലും രണ്ടാം പതിപ്പില് 61 മത്സരങ്ങളിലും മൂന്നാം സീസണില് 46 മത്സരങ്ങളിലും കളി പറഞ്ഞു. നാലാം സീസണില് ഇതുവരെ 46 മത്സരങ്ങള് പൂര്ത്തിയാക്കി. ഐ.എസ്.എല് കമന്ററിയില് മുന്രാജ്യാന്തര താരങ്ങളായ ഐ.എം വിജയനും ജോപോള് അഞ്ചേരിയും ജിജു ജേക്കബുമാണ് ഷൈജു ദാമോദരന്റെ പങ്കാളികള്.
കാല്പ്പന്തുകളിയുടെ സാങ്കേതികവശങ്ങള് വിവരിക്കുന്ന ജിജു ജേക്കബ് പുതിയ പങ്കാളിയായി എത്തിയതോടെ ലൈവ് കമന്ററി കൂടുതല് ഉഷാറായി.
