സെഞ്ചൂറിയന്: യുസ്വേന്ദ്ര ചാഹലിന്റെ കറങ്ങിത്തിരിഞ്ഞ പന്തുകള്ക്കു മുന്നില് അഞ്ച് ദക്ഷിണാഫ്രിക്കന് ബാറ്റ്സ്മാന്മാര് സാഷ്ടാംഗം പ്രണമിച്ചപ്പോള് രണ്ടാം ഏകദിനത്തിലും ഇന്ത്യക്ക് തകര്പ്പന് ജയം. സ്വന്തം നാട്ടില് ഏകദിനത്തിലെ ഏറ്റവും ചെറിയ സ്കോറിനു ആതിഥേയര് പുറത്തായപ്പോള് വിരാട് കോഹ്ലിക്കും സംഘത്തിനും കാര്യങ്ങള് എളുപ്പമായി. ഒന്പതു വിക്കറ്റു ജയവുമായി ആറു കളികളുടെ പരമ്പരയില് ഇന്ത്യ 2-0നു മുന്നിലെത്തി.
സ്പിന് ബൗളിങ്ങിനു മുന്നില് ബാറ്റിങ് ദൗര്ബല്യങ്ങള് മുഴുവന് പ്രകടിപ്പിച്ചപ്പോള് ദ.ആഫ്രിക്കയുടെ ബാറ്റ്സ്മാന്മാരെല്ലാം 118 റണ്സിനു പവലിയനില് മടങ്ങിയെത്തി. മുപ്പത്തിമൂന്നാമത്തെ ഓവറില് ദ.ആഫ്രിക്കന് ഇന്നിംഗ്സ് അവസാനിച്ചു. ഇരുപത്തൊന്നാം ഓവറില് ഒരു വിക്കറ്റ് നഷ്ടത്തില് സന്ദര്ശകര് വിജയം സ്വന്തമാക്കി.
22 റണ്സിന് അഞ്ചു വിക്കറ്റുകള് വീഴ്ത്തിയ ചാഹലും 20 റണ്സിനു മൂന്നു വിക്കറ്റു വീഴ്ത്തിയ കുല്ദീപ് യാദവും ദക്ഷിണാഫ്രിക്കന് നിരയെ വരിഞ്ഞു കെട്ടി.
പരിക്കേറ്റ ക്യാപ്റ്റന് ഡു പ്ലെസിസും സ്റ്റാര് ബാറ്റ്സ്മാന് ഡി വില്ലിയേഴ്സും കളിക്കാതിരുന്നതും തിരിച്ചടിയായി.
ഡുപ്ലെസിസിനും പകരം ടീമിനെ നയിക്കാന് എയ്ഡന് മാര്ക്റാമിനെയാണ് നിയോഗിച്ചത്. സ്വന്തം നാട്ടുകാര്ക്കു മുന്നില് ആദ്യമായി നായക ദൗത്യം കിട്ടിയതിന്റെ പരിഭ്രമങ്ങളെല്ലാം എയ്ഡന് പ്രകടിപ്പിക്കുകയും ചെയ്തു. ടോസ് നഷ്ടമായതു മുതല് കഷ്ടകാലവും.
ടോസ് നേടിയ വിരാട് കോഹ്ലി ദക്ഷിണാഫ്രിക്കയെ ബാറ്റിങ്ങിനു വിട്ടു. പിച്ച് ഇത്ര ചതിക്കും എന്നു വിചാരിച്ചില്ല അവര്. റണ്റേറ്റ് കുറവെങ്കിലും 39 റണ്സുവരെ വിക്കറ്റൊന്നും വീണിരുന്നില്ല. പിന്നീട് പന്ത്രണ്ടു റണ്സിനിടെ നാലു വിക്കറ്റുകള്. നാലിന് 54 എന്ന നിലയില് ചെറുത്തു നില്പ്പ്. പക്ഷേ, അടുത്ത ആറു വിക്കറ്റുകള് വീണത് 19 റണ്സിനിടയ്ക്ക്.
ഡി കോക്ക്(20), ഡുമിനി(25), സോന്ഡോ(25), മോറിസ്(14), മോര്ക്കല്(1) എന്നിവരാണ് ചാഹലിന്റെ ഇരകള്.
മര്ക്കാമിനെയും(8) മില്ലറിനെയും(0) റബാഡയെയും(1) കുല്ദീപ് വീഴ്ത്തി.
ഏകദിനത്തിലെ എട്ടാമത്തെ ചെറിയ സ്കോര് ചെറുക്കാന് കഴിയില്ല എന്ന നിസ്സഹായാവസ്ഥയിലാണ് ദക്ഷിണാഫ്രിക്കന് ബൗളര്മാര് പന്തെറിഞ്ഞത്. പതിനഞ്ചു റണ്സെടുത്ത രോഹിത് ശര്മയെ നഷ്ടപ്പെട്ടതൊഴിച്ചാല് അര്ധസെഞ്ച്വറിയുമായി ശിഖര് ധവാനും(51 നോട്ടൗട്ട്), കോഹ്ലിയും(46 നോട്ടൗട്ട്) അനായാസം വിജയത്തിലേക്ക് എത്തി.
സ്കോര് കാര്ഡ്
ഹാഷിം അംല സി ധോണി ബി ഭുവനേശ്വര് 23
ഡി കോക്ക് സി പാണ്ഡ്യ ബി ചാഹല് 20
മാര്ക്റാം സി ഭുവനേശ്വര് ബി കുല്ദീപ് 8
ഡുമിനി എല്ബി ചാഹല് 25
മില്ലര് സി രഹാനെ ബി കുല്ദീപ് 0
സോന്ഡോ സി പാണ്ഡ്യ ബി ചാഹല് 25
മോറിസ് സി ഭുവനേശ്വര് ബി ചാഹല് 14
റബാഡ എല്ബി കുല്ദീപ് 1
മോര്ക്കല് എല്ബി ചാഹല് 1
താഹിര് ബി ബുംറ 0
ശംസി നോട്ടൗട്ട് 0
എക്സ്ട്രാസ് 1
32,2 ഓവറില് 118നു പുറത്ത്
ബൗളിങ് ഭുവനേശ്വര് 5-1-19-1, ബുംറ 5-1-12-1, പാണ്ഡ്യ 5-0-34-0, ചാഹല് 8.2-1-22-5, കുല്ദീപ് 6-0-20-1, ജാദവ് 3-0-11-0
വിക്കറ്റു വീഴ്ച: 1-39, 2-51, 3-51,4-51, 5-99, 6-107, 7-110, 8-117, 9-118, 10-118
ഇന്ത്യ
രോഹിത് ശര്മ സി മോര്ക്കല് ബി റബാഡ 15
ശിഖര് ധവാന് നോട്ടൗട്ട് 51
വിരാട് കോഹ്ലി നോട്ടൗട്ട് 46
എക്സ്ട്രാസ് 7
20.3 ഓവറില് ഒന്നിന് 119
ബൗളിങ്
മോര്ക്കല് 4-0-30-0, റബാഡ 5-0-24-1, മോറിസ് 3-0-16-0, താഹിര് 5.3-0-30-0, ഷംസി 3-1-18-0. വിക്കറ്റു വീഴ്ച 1-26. 20.3 ഓവറില് 119.
