രാമപുരം (കോട്ടയം): കഴിഞ്ഞദിവസം റോജര് ഫെഡററും ദക്ഷിണ കൊറിയന് താരം ഹ്യൂങ് ചൂങ് ഹിയോണും തമ്മില് നടന്ന ഓസ്ട്രേലിയന് ഓപ്പണ് സെമി ഫൈനല് മത്സരത്തില് കാണികളുടെ മുഖ്യ ആകര്ഷണമായത് മത്സരത്തിന് ടോസ് ചെയ്ത ഗൗതം സന്തോഷ് എന്ന 11 കാരന് മലയാളിയാണ്. ടോസ് ഇടുമ്പോള് ഹെഡോ, ടെയിലോ എന്നു പറയാന് ആരെ വിളിക്കണം എന്ന റഫറിയുടെ ചോദ്യത്തിന് ഒട്ടും ആലോചിക്കേണ്ടി വന്നില്ല ഗൗതമിന്, തന്റെ ആരാധനാപാത്രമായ റോജര് ഫെഡററെ തന്നെ വിളിക്കാന് പറഞ്ഞു.
അഞ്ചാം വയസ്സു മുതല് ടെന്നീസ് കളിച്ചു തുടങ്ങിയ ഗൗതം അതിവേഗം വളരുന്ന ഓസ്ട്രേലിയന് ടെന്നീസ് താരമാണ്. നിലവില് പതിനൊന്ന് വയസ്സുകാരുടെ വിഭാഗത്തില് ദേശീയതലത്തില് ഒന്നാം റാങ്കുകാരനാണ് ഗൗതം. നിക്ക് കിരിയോഡും ബെര്ണാഡ് ടോമിക്കും ഉള്പ്പെടെയുള്ള അന്താരാഷ്ട്ര ഓസ്ട്രേലിയന് ടെന്നീസ് താരങ്ങളുടെ റാങ്കിംഗില് ഇപ്പോള് തന്നെ 1111-ാം സ്ഥാനത്തേക്കെത്തിയിട്ടുണ്ട് ഈ ആറാം ക്ലാസ്സുകാരന്. നിരവധി മുതിര്ന്ന താരങ്ങളെ പിന്തള്ളിയാണ് ഗൗതം മുന്നിരയിലെത്തിയത്.
മൂവാറ്റുപുഴ ആവോലി സ്വദേശി സന്തോഷിന്റെയും പാലാ ഏഴാച്ചേരി പൂവക്കാട്ടില് ബിബിമോളുടെയും മകനാണ് ഗൗതം സന്തോഷ്. ആഷിക്, ദിയ എന്നിവര് സഹോദരങ്ങളാണ്.
