കോട്ടയം: നഗരസഭകളിലും പഞ്ചായത്തുകളിലും പുതിയ ക്ഷേമപെന്ഷനുകള്ക്ക് അപേക്ഷ സ്വീകരിക്കുന്നത് നിര്ത്തി. സാമ്പത്തിക പ്രതിസന്ധി മൂലം പുതിയ അപേക്ഷകള് പരിഗണിക്കണ്ടെന്നാണ് സര്ക്കാര് നിര്ദ്ദേശം. അപേക്ഷകള് സര്ക്കാരിലേക്ക് നല്കാന് നിര്ദ്ദേശിക്കുന്ന ഡാറ്റാ എന്ട്രി സൈറ്റ് തുറക്കാന് കഴിയുന്നില്ല.
ഈ സൈറ്റ് തത്ക്കാലം തുറക്കണ്ടെന്നാണ് ധനവകുപ്പ് രഹസ്യ നിര്ദ്ദേശം പുറപ്പടുവിച്ചിരിക്കുന്നത്. ജനുവരി 15 ന് ശേഷം മാത്രമെ സൈറ്റ് തുറക്കുന്നത് സംബന്ധിച്ച നിര്ദ്ദേശം ലഭിക്കുകയുള്ളുവെന്ന് ഡയറക്ട് ബെനിഫിറ്റ് ട്രാന്സ്ഫര് സെല് അധികൃതര് നല്കി . ജില്ലയിലെ വിവിധ പഞ്ചായത്തുകളിലും നഗരസഭകളിലും ആയിരക്കണക്കിന് അപേക്ഷകളാണ് നടപടി ക്രമം പൂര്ത്തിയാകാതെ കെട്ടികിടക്കുന്നത്.
ഗുണഭോക്താക്കള് പഞ്ചായത്തുകളിലും നഗരസഭകളിലും സമര്പ്പിക്കുന്ന അപേക്ഷകള് പരിശോധിച്ച് അതാത് ഭരണ സമിതികള് തുടര് നടപടിയ്ക്കായി സര്ക്കാരിലേക്ക് ശുപാര്ശ ചെയ്യുന്നുണ്ട്. എന്നാല് സൈറ്റ് തുറക്കാത്തതിനാല് അപേക്ഷകള് സര്ക്കാരിന്റെ മുന്നിലെത്തുന്നില്ല. ആയിരം രൂപയാണ് ക്ഷേമ പെന്ഷനായി ലഭിക്കുന്നത്. കര്ഷകത്തൊഴിലാളികള് ഉള്പ്പെടെയുള്ളവര്ക്ക് ജീവിത സായാഹ്നത്തില് ലഭിക്കുന്ന ഈ സഹായം വലിയ അനുഗ്രഹമായിരുന്നു.
സര്ക്കാര് വലിയ സാമ്പത്തിക പ്രതിസന്ധി നേരിടുന്നതിനാല് പുതിയ അപേക്ഷകള് വലിയ ബാധ്യത ഉണ്ടാക്കുമെന്നാണ് കണക്കാക്കുന്നത്. നിലവില് ക്ഷേമപെന്ഷന് നിധികളിലെ തുക വരെ സര്ക്കാര് ട്രഷറിയിലേക്ക് മാറ്റിയിരിക്കുകയാണ്. കുടിശ്ശികയായ പെന്ഷന് വിതരണം ചെയ്യാനും കടമെടുക്കേണ്ടി വന്നു. അതിനാല് പുതിയ അപേക്ഷകള് കഴിവതും നിരുത്സാഹപ്പെടുത്താനാണ് സര്ക്കാര് ശ്രമിക്കുന്നത്. അതേ സമയം അപേക്ഷ കൊടുത്ത് പെന്ഷനായി കാത്തിരിക്കുന്നവര് നഗരസഭകളും പഞ്ചായത്തുകളും കയറിയിറങ്ങുകയാണ്്.
എല്ഡിഎഫ് സര്ക്കാര് അധികാരത്തില് വന്നപ്പോഴും ക്ഷേമ പെന്ഷന് അപേക്ഷകളില് തീരുമാനമെടുക്കുന്നത് വൈകിപ്പിച്ചു. ഒന്നിലേറെ പെന്ഷന് ഒരേ വ്യക്തി കൈപ്പറ്റുന്നതായ ആരോപണങ്ങളെ തുടര്ന്നയായിരുന്നു ഇത്. ഇക്കാര്യത്തില് വ്യക്തത വരുത്തി സര്ക്കാര് പുതിയ ഉത്തരവിറക്കി അപേക്ഷ സ്വീകരിച്ച് തുടങ്ങിയപ്പോഴാണ് സാമ്പത്തിക പ്രതിസന്ധി ബാധിച്ചത്. അതേ സമയം ക്ഷേമ പെന്ഷനുകള് കൈപ്പറ്റുന്നവരുടെ എണ്ണം പരമാവധി ചുരുക്കാനാണ് സര്ക്കാര് ലക്ഷ്യമിടുന്നതെന്നാണ് ആരോപണം.
