മെല്ബണ്: ഡേവിഡ് വാര്ണറുടെ സെഞ്ചുറിയുടെ മികവില് ഓസ്ട്രേലിയയ്ക്ക് ആഷസ് പരമ്പരയിലെ നാലാം ടെസ്റ്റില് ഉജ്ജ്വല തുടക്കം. ഒന്നാം ദിനം കളിനിര്ത്തുമ്പോള് അവര് മൂന്ന് വിക്കറ്റിന് 244 റണ്സ് എടുത്തിട്ടുണ്ട്. സെഞ്ചുറിയിലേക്ക് നീങ്ങുന്ന ക്യാപ്റ്റന് സ്മിത്ത് 65 റണ്സുമായി പുറത്താകാതെ നില്ക്കുന്നു. 31 റണ്സുമായി മാര്ഷാണ് സ്മിത്തിന് കൂട്ട്.
സെഞ്ചുറിക്ക് ഒരു റണ്സ് മാത്രം അകലെ നില്ക്കെ വാര്ണറുകടെ ബാറ്റിനരികില് കൊണ്ട് പൊങ്ങിയ പന്ത് മിഡ് ഓണില് ഫീല്ഡര് ക്യാച്ചെടു്ത്തു. വാര്ണറുടെ പുറത്താകലില് ആഹ്ലാദിച്ച ഇംഗ്ലണ്ടിന്റെ ആഘോഷം അധികം നീണ്ടില്ല. റിപ്ലേയില് അരങ്ങേറ്റക്കാരാനായ ടോം കറന്സ് എറിഞ്ഞ പന്ത് നോബോളാണെന്ന് തെളിഞ്ഞു. ക്രീസില് തിരിച്ചെത്തിയ വാര്ണര് അടുത്ത പന്തില് തന്നെ നൂറ് തികച്ചു.ടെസ്റ്റിലെ 21-ാം സെഞ്ചുറി. ഇതോടെ 70 ടെസ്റ്റില് വാര്ണര് ആറായിരം റണ്സ് കടന്നു.
തുടക്കത്തിലെ അടിച്ചുതകര്ന്ന വാര്ണര് ആദ്യ നാല്പ്പതു മിനിറ്റില് 90 റണ്സ് നേടി. സെഞ്ചുറി തികച്ചശേഷം അധികനേരം പിടിച്ചുനില്ക്കാനായില്ല.103 റണ്സ് സ്വന്തം പേരില് കുറിച്ചിട്ട വാര്ണറെ ആന്ഡേഴ്സണിന്റെ പന്തില് ബെയര്സ്റ്റോ പിടികൂടി. 151 പന്തില് 13 ഫോറും ഒരു സിക്സറും അടിച്ചു.
2014 ലെ ബോക്സിങ്ങ് ഡേ ടെസ്റ്റ് മുതല് മെല്ബണില് കീഴടങ്ങാതെ നില്ക്കുന്ന ഓസീസ് നായകന് വീണ്ടുമൊരു അപരാജിത ഇന്നിങ്ങ്സിലേക്ക് നീങ്ങുകയാണ്.131 പന്ത് നേരിട്ട സ്മിത്ത് ആറെണ്ണം അതിര്ത്തികടത്തിയാണ് 65 റണ്സിലെത്തി നില്ക്കുന്നത്.
മെല്ബണിലെ അവസാന മൂന്ന് ബോക്സിങ്ങ് ഡേ ടെസ്റ്റുകളില് സ്മിത്ത് ഇന്ത്യക്കെതിരെ 192 റണ്സും വെസ്റ്റ് ഇന്ഡീസിനെതിരെ 134 റണ്സും പാക്കിസ്ഥാനെതിരെ 165 റണ്സും നേടി പുറത്താകാതെ നിന്നു. നിലവിലെ ആഷസ് പരമ്പരയില് അഞ്ച് ഇന്നിങ്ങ്സിലായി സ്മിത്ത് 491 റണ്സ് സമ്പാദിച്ചുകഴിഞ്ഞു.163.66 ശതമാനമാണ് ശരാശരി.
ആദ്യത്തെ മൂന്ന് ടെസ്റ്റും വിജയിച്ച ഓസ്ട്രേലിയ പരമ്പരയില് 3-0 ന്റെ തകര്ക്കാന് പറ്റാത്ത ലീഡ് സ്വന്തമാക്കിക്കഴിഞ്ഞു. നാലും അഞ്ചും ടെസ്റ്റുകള് കൂടി നേടി പരമ്പര തൂത്തുവാരാനുള്ള ശ്രമത്തിലാണ് സ്മിത്തും കൂട്ടുകാരും.
ബാറ്റിങ്ങ് തെരഞ്ഞെടുത്ത ഓസീസിന് വാര്ണറും ബാന്ക്രോഫ്റ്റും ആദ്യ വിക്കറ്റില് 122 റണ്സ് അടിച്ചെടുത്തു നല്ല തുടക്കം സമ്മാനിച്ചു. 26 റണ്സ് നേടിയ ബാന്ക്രോഫ്റ്റിനെ വിക്കറ്റിന് മുന്നില് കുടുക്കി വോക്ക്സാണ് ഈ കൂട്ടുകെട്ട് തകര്ത്തത്്. തുടര്ന്നെത്തിയ ഖവാജ 17 റണ്സുമായി മടങ്ങി. ബോര്ഡിനാണ് വിക്കറ്റ്. ബെയര്സ്റ്റോ ക്യാച്ചെടുത്തു.
