കരുനാഗപ്പള്ളി: രാഷ്ട്രമാണ് ഏറ്റവും വലിയ ഈശ്വരനെന്ന് സ്വാമി വേദാമൃതചൈതന്യ.
കൊല്ലം ഗ്രാമജില്ലയുടെ പ്രാഥമികശിക്ഷവര്ഗ് ഉദ്ഘാടനം ചെയ്യുകയായിരുന്നു സ്വാമി. ഇന്നത്തെ സാമൂഹികഅന്തരീക്ഷത്തില് പ്രതികൂലസാഹചര്യത്തില്പ്പോലും രാഷ്ട്രത്തിനുവേണ്ടി പ്രവര്ത്തിച്ചു വരുന്നവരാണ് സ്വയംസേവകര്. ഹിന്ദുസമൂഹം എപ്പോഴെല്ലാം വെല്ലുവിളികള് നേരിടുന്നുവോ അപ്പോഴെല്ലാം താങ്ങും തണലുമായി സംഘപ്രവര്ത്തകര് ഒപ്പമുണ്ട്. ഭീകരവാദം, ലൗ ജിഹാദ് ഉള്പ്പെടെയുള്ളവയില് കുടുങ്ങുന്ന യുവതലമുറയുടെ ജീവിതത്തില് സ്വയംസേവകര് ജാഗ്രതയോടെ പ്രവര്ത്തിക്കേണ്ടതും, നിരവധി സാമൂഹിക ഉത്തരവാദിത്തങ്ങള് നിര്വ്വഹിക്കേണ്ടതുമാണ്. എന്നും രാഷ്ട്രസേവ മാതൃസേവയായി കാണണമെന്നും സ്വാമി പറഞ്ഞു.
ഇന്നത്തെ വിദ്യാഭ്യാസം ജോലി സമ്പാദനത്തില് മാത്രമായി ചുരുങ്ങിയെന്ന് മുഖ്യപ്രഭാഷണം നടത്തിയ വിഭാഗ് കാര്യവാഹ് വി.പ്രതാപന് പറഞ്ഞു. നാടിനായി പൂര്ണ്ണ മനസ്സോടെ സമര്പ്പിക്കാനുള്ള വിദ്യാഭ്യാസരീതി ഉണ്ടാകണമെന്നും മനസും, ശരീരവും, ബുദ്ധിയും അടങ്ങിയ പൂര്ണ്ണസമര്പ്പണമാണ് സംഘ പ്രവര്ത്തനമെന്നും പറഞ്ഞു.
ചടങ്ങില് വര്ഗ് അധികാരി ഡോ: ഡി.എസ്.ഹരികൃഷ്ണന്, വര്ഗ്കാര്യവാഹ് എന്.രാജന്, ആര്.സുജിത്ത്, എസ്.രാജേഷ് എന്നിവര് പങ്കെടുത്തു. പുത്തൂര്, ശാസ്താംകോട്ട, ചവറ, കരുനാഗപ്പള്ളി എന്നിവിടങ്ങളില് നിന്നുള്ള 200 പ്രവര്ത്തകരാണ് വര്ഗില് പങ്കെടുക്കുന്നത്. 31ന് രാവിലെ സമാപിക്കും.
