തിരുവനന്തപുരം: ആറ്റുകാല്ക്ഷേത്ര ഉത്സവത്തിന്റെ രണ്ടാം ദിനത്തിലെ പൂജ ക്ഷേത്രട്രസ്റ്റിന് വിട്ട് നല്കിയെന്ന് ആറ്റുകാല് ക്ഷേത്ര ട്രസ്റ്റ് അംഗവും ഐഎസില് ചേര്ന്ന നിമിഷയുടെ അമ്മയുമായ ബിന്ദു വാര്ത്താസമ്മേളനത്തില് പറഞ്ഞു. പാരമ്പര്യമായി ആറ്റുകാല് പൊങ്കാല ഉത്സവത്തിലെ രണ്ടാംദിവസത്തെ പൂജ നടത്തുന്നത് തെക്കെവീട് കുടംബക്കാരായിരുന്നു. കുടുംബാംഗമായ ബിന്ദുവായിരുന്നു പൂജയ്ക്കുള്ള തുക നല്കിവരുന്നത്. ബിന്ദുവിന്റെ മകന് ഇന്ത്യന് സൈന്യത്തിലെ മേജറായി ജോലി നോക്കുന്നു. മകളെക്കുറിച്ച് വിവരങ്ങള് ഒന്നും ലഭ്യമല്ല. അടുത്ത അവകാശിയായി പൂജ നടത്താന് മകന് താത്പര്യമില്ലാത്തതിനാലാണ് പൂജ വിട്ടു നല്കുന്നതായി ക്ഷേത്രട്രസ്റ്റിനെ രേഖാമൂലം അറിയിക്കുന്നതെന്ന് ബിന്ദു പറഞ്ഞു.
62000 രൂപയാണ് പൂജയ്ക്കായി നല്കുന്നത്. ഈ തുക നിര്ധനര്ക്ക് നല്കാനോ വിദ്യാഭ്യാസ ധനസഹായം ചെയ്യാനോ ഇനി വിനിയോഗിക്കും. മകള് പോയ വിഷമത്തിലായിതിനാല് ഏതാനും വര്ഷങ്ങളായി ആറ്റുകാല് പൊങ്കാല ഉത്സവത്തിന് വീട്ടില് കഴിയാറില്ല. അതിനാലാണ് പൊങ്കാലയ്ക്കായി എത്തുന്ന ഭക്തജനങ്ങള്ക്ക് വീട്ടുവളപ്പില് അടുപ്പുകൂട്ടുന്നതിന് ഗേറ്റ് തുറന്ന് കൊടുക്കാന് സാധിക്കാത്തത്. ഒരു പ്രതിസന്ധി ഉണ്ടായപ്പോള് റസിഡന്സ് അസോസിയേഷന് ഭാരവാഹികളോ ക്ഷേത്ര ട്രസ്റ്റോ എന്എസ്എസോ കൂടെ നിന്നില്ല. പൂജ വിട്ടുനല്കുന്നതില് മറ്റാരുടെയും സമ്മര്ദ്ദം ഇല്ല. എന്നാല് ക്ഷേത്ര ട്രസ്റ്റ് അംഗത്വം രാജിവയ്ക്കില്ലെന്നും ബിന്ദു പറഞ്ഞു.
