പാനൂര്: ക്രിമിനല് നേതാവിനെ സംരക്ഷിക്കുന്നതിനെതിരെ അരയാക്കൂലില് സിപിഎമ്മിനെതിരെ വന്ജനരോഷം. അരയാക്കൂലിലെ ജന്മീന്റെവിട ബിജുവും സംഘവും നടത്തുന്ന അക്രമത്തിന് സിപിഎം സഹായം നല്കുന്നൂവെന്ന് ആരോപിച്ചാണ് ഒരു വിഭാഗം സിപിഎം പ്രവര്ത്തകര് തന്നെ രംഗത്തെത്തിയിട്ടുളളത്. കഴിഞ്ഞ ദിവസം സിപിഎം പ്രവര്ത്തകനായ കുഞ്ഞന്റവിട ശരത്തിന്റെ കൈകാലുകള് തല്ലിതകര്ത്തതില് മുഖ്യപ്രതിയായ ബിജു രണ്ടു കൊലകേസടക്കം നിരവധി കേസുകളില് പ്രതിയാണ്. ഈയിടെയാണ് ബിജുവിന്റെ സഹോദരനും ഡിവൈഎഫ്ഐ നേതാവുമായ മുത്തുവിനെ ബിജുവും, സംഘവും അക്രമിച്ചത്. പണം വെച്ച് ശീട്ടുകളി നടക്കുന്നത് പോലീസിനെ അറിയിച്ചതിനായിരുന്നു അക്രമം.
അന്ന് കണ്ണില്പൊടിയിടാന് ചമ്പാട് ലോക്കല് കമ്മറ്റി ബിജുവിനും കൂട്ടാളികള്ക്കും പാര്ട്ടിയുമായി ബന്ധമില്ലെന്ന് പ്രസ്താവനിയിറക്കിയിരുന്നു. അതിനുശേഷം സംഘര്ഷം നടന്ന പാലക്കൂല്, കൈവേലിക്കല് ഭാഗങ്ങളില് ക്രിമിനല് സംഘത്തെ നിയന്ത്രിച്ചതില് ബിജുവായിരുന്നു മുന്നിലുണ്ടായിരുന്നത്. പാര്ട്ടി പുറത്താക്കിയെന്ന് പറഞ്ഞതിനു ശേഷം പാലക്കൂലില് നടന്ന പ്രകടനത്തിലും ബിജുവും സംഘവുമുണ്ടായിരുന്നു. ചിത്രസഹിതം ജന്മഭൂമി അതു വാര്ത്തയായി നല്കിയിരുന്നു. ബിജെപി പ്രവര്ത്തകരായ കുന്നോത്ത്പറമ്പിലെ രാജേഷ്, കുറിച്ചിക്കര വിനയന് വധത്തില് മുഖ്യപ്രതിയാണ് ബിജു. കുഴല്പണം കവരുന്ന സംഘത്തിലെ പ്രധാന കണ്ണികൂടിയാണ് ഇയാളെന്ന് പോലീസും പറയുന്നു. പല മേഖലകളില് നിന്നും കുഴല്പ്പണം ബിജുവിന്റെ നേതൃത്വത്തില് കവര്ന്നിട്ടുളളതായും വിവരമുണ്ട്.
കാപ്പ ചുമത്തി മുന്പ് നാടുകടത്താന് ശ്രമം നടന്നെങ്കിലും സിപിഎം നേതൃത്വം ഇടപ്പെട്ട് ഒഴിവാക്കുകയായിരുന്നു. ഡിവൈഎഫ്ഐ സംസ്ഥാന കമ്മറ്റി അംഗമായിരുന്ന പി.വി.രജീന്ദ്രനാഥിനെ അരയാക്കൂലില് വെച്ചു തന്നെ ബിജു തല്ലിയിരുന്നു. അന്നും ഇയാളെ പാര്ട്ടി സംരക്ഷിച്ചു. കല്ല്യാണവീട്ടില് നിന്നും പരസ്യമായി മദ്യപിക്കുന്നത് ചോദ്യം ചെയ്തതിന് സ്ത്രീകളടക്കമുളളവരെ മര്ദ്ധിച്ച സംഭവത്തിലും പാര്ട്ടി സംരക്ഷിച്ചു. സ്വന്തം വീട്ടുകാരെ അക്രമിച്ചപ്പോഴും സിപിഎം ബിജുവിനൊപ്പം തന്നെയാണെന്നതിനാല് ശരത്തിനെ വധിക്കാന് ശ്രമിച്ചതിലും പാര്ട്ടി ഒപ്പമുണ്ടാകുമെന്ന നിലപാടു തന്നെയാണ് നാട്ടുകാരില് പ്രതിഷേധമുയരാന് കാരണം. പാനൂര് മേഖലയില് ആര്എസ്എസ് നേതാക്കളെയടക്കം അപായപ്പെടുത്താന് സിപിഎം ഏല്പ്പിച്ചതും ഇതേ സംഘത്തെയാണെന്നാണ് വിവരം. വാഹനങ്ങളില് സായുധരായി കറങ്ങുന്ന ഇയാള്ക്കെതിരെ മൊഴിനല്കാന് പോലും ശരത്ത് ഭയപ്പെട്ടിരുന്നതായി അന്വേഷണ ഉദ്യോഗസ്ഥന് പറഞ്ഞു.
