കോട്ടയം: കേരള കോണ്ഗ്രസ് മാണി വിഭാഗത്തിന്റെ സമ്മേളനമാമാങ്കം ഇന്ന് കോട്ടയം നെഹ്രു സ്റ്റേഡിയത്തില്. നേതാക്കള് പ്രഖ്യാപിച്ച മുന്നണി പ്രവേശനവും, നേതൃമാറ്റവും താല്ക്കാലികമായി മാറ്റിവെച്ചാണ് സമ്മേളനം നടക്കുന്നത്.
മുന്നണി ബന്ധം അവസാനിപ്പിച്ച് ഒറ്റയ്ക്ക് നില്ക്കുന്ന മാണി വിഭാഗത്തിന് ശക്തി തെളിയിച്ചേ പറ്റൂ എന്ന സാഹചര്യമുള്ളതിനാല്പതിവിലേറെ മുന്നൊരുക്കങ്ങളാണ് അണിയറയില് നടന്നത്.
മുന്നണി പ്രവേശനം സംബന്ധിച്ച് പ്രഖ്യാപനങ്ങള് ഉണ്ടാകില്ലെന്ന് പാര്ട്ടി ചെയര്മാന് കെ.എം. മാണി തന്നെ വ്യക്തമാക്കിയിട്ടുണ്ടെങ്കിലും ചില സൂചനകളെങ്കിലും ഇന്ന് നല്കുമെന്നാണ് സൂചന. നേതൃസ്ഥാനത്തേക്ക് മകനും വൈസ് ചെയര്മാനുമായ ജോസ് കെ. മാണിയെ മഹാമ്മേളനത്തില് വാഴിക്കാനുള്ള നീക്കങ്ങള് തുടക്കത്തിലെ തന്നെ വര്ക്കിങ് ചെയര്മാന് പി.ജെ. ജോസഫും കൂട്ടരും വെട്ടി.
സമ്മേളനത്തിന്റെ പൂര്ണ്ണചുമതല വഹിക്കുന്ന ജോസ് കെ. മാണിയുടെ നേതൃശേഷിയുടെ ഉരകല്ലായി സമ്മേളനത്തെ മാറ്റാനുള്ള നീക്കങ്ങളാണ് ആവിഷ്കരിച്ചിരിക്കുന്നത്. ലക്ഷം പേര് പങ്കെടുക്കുമെന്നാണ് പ്രഖ്യാപിച്ചിരിക്കുന്നത്.
സംസ്ഥാനത്തിന്റെ വിവിധ ഭാഗങ്ങളില് നിന്ന് വാഹനങ്ങളിലെത്തുന്ന പ്രവര്ത്തകരെ ജാഥയായി നെഹ്രു സ്റ്റേഡിയത്തില് എത്തിക്കുന്ന പദ്ധതിയാണ് ആവിഷ്കരിച്ചിരിക്കുന്നത്. ഗതാഗത തടസ്സമില്ലാതെ ഇത് എത്രമാത്രം പ്രാവര്ത്തികമാകുമെന്നത് കണ്ടറിയണം.
നാളെ പ്രതിനിധി സമ്മേളനത്തില് പതിവ് കര്ഷകപ്രശ്നങ്ങള്ക്ക് പുറമേ പാര്ട്ടിക്ക് പുതിയ പരിവേഷം സൃഷ്ടിക്കുന്നതിന്റെ ഭാഗമായി ‘എന്റെ കേരളം’ എന്ന നയരേഖ അവതരിപ്പിക്കുമെന്നാണ് സൂചന.
