ഇരിട്ടി: ടിപ്പര് തൊഴിലാളികളെയും ഉടമകളെയും ഒന്നടങ്കം അധിക്ഷേപിച്ചുകൊണ്ട് ക്രഷര് ഉടമകളുടെ ജില്ലാ കമ്മറ്റി നടത്തിയ പ്രസ്താവന വാസ്തവവിരുദ്ധവും സാധാരണക്കാരുടെ കണ്ണില് പൊടിയിടാനും അതുവഴി ക്രഷര് ഉല്പന്നങ്ങള്ക്ക് നടപ്പാക്കാനിരിക്കുന്ന ഭീമമായ വിലവര്ധനവ് മൂടിവെക്കാനുള്ള തന്ത്രവുമാണെന്ന് സംയുക്ത ടിപ്പര് തൊഴിലാളി യൂണിയന് ഇരിട്ടി മേഖലാ കമ്മറ്റി ആരോപിച്ചു. ക്രഷറുകളില് നടപ്പിലാക്കികൊണ്ടിരിക്കുന്ന വേബ്രിഡ്ജ് സംവിധാനത്തിന് ടിപ്പര് തൊഴിലാളികളും ഉടമകളും എതിരാണെന്ന വാര്ത്ത അടിസ്ഥാനരഹിതമാണ്. വേബ്രിഡ്ജ് സംവിധാനം നടപ്പാക്കണമെന്ന ടിപ്പര് തൊഴിലാളികളുടെ ആവശ്യത്തിന് ഏറെ പഴക്കമുള്ളതാണ്. കാലാകാലങ്ങളില് ക്രഷറുകളില് ഉണ്ടാകുന്ന അന്യായമായ വിലവര്ധനവിനെതിരെ ശക്തമായ സമരങ്ങള് നടത്തിയിട്ടുള്ളതും ഇത്തരം കാര്യങ്ങള് സമൂഹത്തിലേക്ക് എത്തിച്ചിട്ടുള്ളതും ഇടനിലക്കാര് കൂടിയായ ടിപ്പര് തൊഴിലാളികള് തന്നെയാണ്.
ക്രഷറുകള്ക്കെതിരെ ടിപ്പര് തൊഴിലാളികള് സമരം നടത്തുന്നതെന്തിനാണെന്നാണ് ക്രഷര് ഉടമകളുടെ ചോദ്യം. ടിപ്പര് തൊഴിലാളികള് ക്രഷറുകള്ക്കെതിരെ സമരം ചെയ്തിട്ടില്ല. ക്രഷറുകള്ക്കെതിരുമല്ല. അവരുടെ ഭാഗത്തുനിന്നുള്ള ചില തെറ്റായ നയങ്ങള്ക്കെതിരെയാണെന്നും പ്രാദേശികമായുള്ള ചില വിഷയങ്ങളില് മുഴുവന് ടിപ്പര് തൊഴിലാളികളേയും അടച്ചാക്ഷേപിക്കുന്ന തരത്തിലുള്ള അപവാദ പ്രചാരണങ്ങള് അവസാനിപ്പിക്കണമെന്നും യോഗം ആവശ്യപ്പെട്ടു. പ്രസിഡന്റ് വി.മുരളീധരന് അധ്യക്ഷത വഹിച്ചു. സെക്രട്ടറി പ്രസാദ് കീര്ത്തനം, ഉണ്ണി കേളന്പീടിക, തങ്കച്ചന് മുള്ളന്കുഴി എന്നിവര് പ്രസംഗിച്ചു.
