കണ്ണൂര്: കണ്ണൂര് താലൂക്ക് ഓഫീസിന് മുന്നിലുള്ള മതിലില് ചുവന്ന പെയിന്റടിച്ച് സിപിഎം ബുക്ക് ചെയ്തു. കണ്ണൂര് കാള്ടെക്സ് ജംഗ്ഷനിലുള്ള താലൂക്ക് ഓഫീസിന്റെ മതിലാണ് ചുവന്ന ചായം പൂശിയിരിക്കുന്നത്. കാള്ടക്സ് ജംഗ്ഷനില് എകെജി പ്രതിമ സ്ഥാപിച്ചതിനടുത്താണ് താലൂക്ക് ഓഫീസ് സ്ഥിതി ചെയ്യുന്നത്. നേരത്തെ എയ്ഡ്സ് അവബോധത്തിന്റെ ഭാഗമായി എയ്ഡ്സ് കണ്ട്രോള് സൊസൈറ്റിയുടെ അറിയിപ്പായിരുന്നു മതിലിലുണ്ടായിരുന്നത്. നൂറുകണക്കിനാളുകള് ദിനംപ്രതി കടന്നുപോകുന്ന സ്ഥലത്ത് എയ്ഡ്സ് അവബോധത്തിനുവേണ്ടി മതിലില് എഴുതിവെച്ച പരസ്യം പൂര്ണ്ണമായും ചുവന്ന ചായമടിച്ച നിലയിലാണ്.
സാധാരണയായി സര്ക്കാരിന്റെ ഔദ്യോഗിക പരസ്യങ്ങളും മറ്റ് അറിയിപ്പുകളും എഴുതിയ സ്ഥലങ്ങള് സ്വകാര്യവ്യക്തികളോ മറ്റ് സംഘടനകളോ കൈമാറുന്ന പതിവില്ല. ഇതിന് വിരുദ്ധമായാണ് മതിലില് ചുവന്ന ചായമടിച്ചിരിക്കുന്നത്.
