ചെല്ലാനത്തെ ദുരിതാശ്വാസ ക്യാമ്പിലെത്തിയ മുന് മുഖ്യമന്ത്രി ഉമ്മന്ചാണ്ടി പ്രതിഷേധത്തെ തുടര്ന്ന് പുറത്ത് കാത്ത് നില്ക്കുന്നു
പള്ളുരുത്തി (കൊച്ചി): ഓഖി ദുരന്തം വിതച്ച ചെല്ലാനത്തെ മത്സ്യത്തൊഴിലാളികള് താമസിക്കുന്ന ദുരിതാശ്വാസ ക്യാമ്പിലെത്തിയ മുന് മുഖ്യമന്ത്രി ഉമ്മന് ചാണ്ടിയെയും കോണ്ഗ്രസ് നേതാക്കളെയും നാട്ടുകാര് തടഞ്ഞു. ഇന്നലെ രാവിലെ ഒന്പതരയോടെ ചെല്ലാനം സെന്റ് മേരീസ് സ്കൂളിലെ ദുരിതാശ്വാസ ക്യാമ്പിലാണ് സംഭവം.
ഹൈബി ഈഡന് എംഎല്എ, മുന് എംഎല്എമാരായ ഡൊമിനിക് പ്രസന്റേഷന്, ബെന്നി ബെഹനാന്, ഡിസിസി പ്രസിഡന്റ് ടി.ജെ. വിനോദ് എന്നിവരെയും പ്രാദേശിക നേതാക്കളെയുമാണ് തടഞ്ഞത്. ദുരിതാശ്വാസ ക്യാമ്പിനു മുന്നില് കോണ്ഗ്രസ്സ് സംഘം എത്തിയ ഉടനെ സ്ത്രീകളുള്പ്പെടെയുള്ളവര് എതിര്പ്പുമായി എത്തി. നേതാക്കളെ ആരേയും ക്യാമ്പിനകത്തേക്ക് കടത്തിവിടില്ലെന്ന നിലപാടിലായിരുന്നു അവര്. കെഎല്സിഎ രൂപതാ ഡയറക്ടര് ആന്റണി കൊഴുവേലി ഉച്ചഭാഷിണിയിലൂടെ, നേതാക്കള് ആരും ക്യാമ്പിലേക്ക് കയറരുതെന്ന് നിര്ദ്ദേശിച്ചതോടു കൂടി ജനം വീണ്ടും ഇളകി.
സഭാനേതാക്കളുമായി ചര്ച്ച നടത്തിയശേഷം ഉമ്മന് ചാണ്ടി, ഹൈബി ഈഡന്, ഡൊമിനിക്ക് പ്രസന്റേഷന് എന്നിവരെ ക്യാമ്പിലെ സമരപ്പന്തലിലേക്ക് കടത്തിവിട്ടു. സമരപ്പന്തലിലേയ്ക്ക് കയറാന് ശ്രമിച്ച ടി.ജെ. വിനോദിനു നേരെ അസഭ്യവര്ഷവുമായി ഒരു സംഘം എത്തി.
കടല്ഭിത്തിയുടേയും പുലിമുട്ടിന്റേയും നിര്മ്മാണം ഉടന് ആരംഭിക്കണമെന്ന് ആവശ്യപ്പെട്ട് അഞ്ചു ദിവസമായി തീരദേശവാസികള് റിലേ നിരാഹാരം നടത്തുകയാണ്.
ദുരന്തം നടന്ന ദിവസങ്ങളില് തീരത്തേക്ക് വരാത്ത രാഷ്ട്രീയക്കാരെ തടയുമെന്ന് നാട്ടുകാര് പറഞ്ഞു. പ്രശ്നം നിയമസഭയില് ഉന്നയിക്കുമെന്ന് ഉമ്മന് ചാണ്ടി സമരക്കാര്ക്ക് ഉറപ്പു നല്കി.
