എം.പി.ഗോപാലകൃഷ്ണന്
തലശ്ശേരി: റഷ്യക്കാരനായ മിഹായേല് മണ്ഡല നാളുകളില് മലയാള നാട്ടിലെ ക്ഷേത്രത്തില് പരികര്മിയാകുന്നു. മാഹിക്കടുത്ത് അഴിയൂര് വേണുഗോപാല ക്ഷേത്രത്തില് പതിവായി തൊഴാനെത്തുന്നവര്ക്ക് ഈ മോസ്ക്കോക്കാരനായ ഇലക്ടിക്കല് എഞ്ചിനിയറെ നല്ലത് പോലെ അറിയാം. എന്നാല് ഭക്തിപാരവശ്യത്തോടെ ക്ഷേത്രത്തിന് മുന്നില് വിളക്ക് കൊളുത്തുന്നതും ചെണ്ടകൊട്ടുന്നതും കൂടെ ഭജന പാടുന്നതുമെല്ലാം പഴയ വിപ്ലവ മണ്ണില് നിന്നും പറന്നു വന്ന ഒരു മോസ്കോക്കാരനാണെന്ന് ആദ്യമായി തിരിച്ചറിയുന്നവര് അവിശ്വസനീയമായി നോക്കി നില്ക്കും.
കാഴ്ചയില് തനിമലയാളിയാണ് മിഹായേല്. കറുപ്പുടുത്ത്, മാലയിട്ട്, നെറ്റിയില് ഭസ്മവും ചാര്ത്തി ശരണമന്ത്രങ്ങള് ഉരുക്കഴിക്കുന്ന മിഹായേല് ഇത്തവണയും മല ചവിട്ടാനുള്ള ഒരുക്കത്തിലാണ്. ആരാധനാലയങ്ങള് അന്യംനിന്നുപോയ പഴയ സോവിയറ്റ് റഷ്യയില് നിന്നും തുടര്ച്ചയായി ഏഴാം തവണയാണ് മിഹായേല് അഴിയൂരിലെത്തുന്നത്. ചികിത്സക്കായിരുന്നു ആദ്യമായി ഇവിടെ വന്നത്. 2010 ല് ഇവിടത്തെ ആയുര്വ്വേദ ആശുപത്രിയില് പ്രവേശിപ്പിക്കപ്പെട്ടു. ചികിത്സയുടെ ഇടവേളകളില് മനഃശ്ശാന്തി തേടി തൊട്ടടുത്ത ക്ഷേത്രത്തിലെത്തുമായിരുന്നു. ഇവിടെവെച്ച് യാദൃശ്ചികമായി പരിചയപ്പെട്ട ഗുരുസ്വാമി രാജനാണ് കേരളത്തിലെ ക്ഷേത്രാചാരങ്ങളെക്കുറിച്ചും അയ്യപ്പ സന്നിധിയായ ശബരിമലയെക്കുറിച്ചും മിഹായേലിനെ അറിയിച്ചത്. ഇതോടെ അയ്യപ്പനെ തൊഴാന് പോകണമെന്ന ആഗ്രഹം പ്രകടിപ്പിച്ചപ്പോള് രാജന് സ്വാമി തന്നെവ്രതാനുഷ്ടാനങ്ങളെക്കുറിച്ചും മണ്ഡലകാല ചിട്ടകളെക്കുറിച്ചും പഠിപ്പിച്ചു. അങ്ങിനെ ആറ് വര്ഷം മുന്പ് ആദ്യമായി ഈ യുവാവ് മല ചവിട്ടി സന്നിധാനത്തെത്തി ഭഗവാന് അയ്യപ്പസ്വാമിയെ വണങ്ങി. അന്നു മുതല് എല്ലാ വര്ഷവും മണ്ഡലകാലത്ത് മിഹായേല് അഴിയൂരെത്തും. മാലയിട്ട് വ്രതം നോറ്റ് ഗുരുസ്വാമി രാജന്റെ നേതൃത്വത്തിലുള്ള സ്വാമിമാരോടൊപ്പം കെട്ടുനിറച്ച് സന്നിധാനത്തെത്തും. കഴിഞ്ഞ വര്ഷം വരുമ്പോള് മോസ്കോയില് നിന്ന് ഭാര്യ ജൂലിയും അമ്മ നഥാലിയയും മിഹായേലിനൊപ്പം അഴിയൂര് ചുങ്കത്ത് എത്തിയിരുന്നു. അമ്മ മാലയിട്ട് വ്രതമനുഷ്ടിച്ച് ശബരിമല ദര്ശനം നടത്തിയതിന് ശേഷമാണ് തിരിച്ച് പോയത്. വേണുഗോപാലക്ഷേത്രത്തിലെ എല്ലാ ചിട്ടവട്ടങ്ങളും മിഹായിലിന് ഇപ്പോള് മനഃപാഠമാണ്. പുലര്ച്ചെ 4 മണിക്ക് ശാന്തിക്കാരന് ക്ഷേത്രത്തിലെത്തുമ്പോള് ഇദ്ദേഹവും എത്തിയിട്ടുണ്ടാവും. ശ്രീകോവിലിനുള്ളിലെ പൂജയൊഴിച്ച് ഒരു കീഴ്ശാന്തി ചെയ്യുന്ന എല്ലാ കാര്യങ്ങളും മിഹായേല് ഭയഭക്തിയോടെ നിറവേറ്റും. വേറിട്ടൊരു അനുഷ്ടാനം പോലെ മണ്ഡലകാലം മുഴുവന് ഈ റഷ്യന് സാന്നിധ്യം ഇവിടെ ഉണ്ടായിരിക്കും.
