കൊച്ചി: വര്ഗസമരം കൊണ്ട് പ്രശ്നങ്ങള് പരിഹരിക്കാന് കഴിയില്ലെന്നും സംഘട്ടനത്തിലൂടെ പുരോഗതിയും സമാധാനവും കൈവരിക്കാനാകില്ലെന്നും ഓ. രാജഗോപാല് എംഎല്എ. ഇരുപത്തിയൊന്നാമതു കൊച്ചി അന്താരാഷ്ട്ര പുസ്തകോത്സവത്തിന്റെ ഭാഗമായി നടന്ന ദീനദയാല് ഉപാദ്ധ്യായ ജന്മശതാബ്ദി ഏകാത്മമാനവദര്ശനം അന്പതാം വര്ഷം സെമിനാര് ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം.
ഐക്യത്തിന്റെയും പരസ്പര സഹകരണത്തിന്റെയും രാഷ്ട്രീയമാണ് ഇന്ത്യക്ക് ആവശ്യം. രാജ്യത്ത് നിലനില്ക്കുന്ന വ്യവസ്ഥിതിയില് മാറ്റം വേണം. സമ്പത്ത് കുറച്ച് ആളുകളുടെ മാത്രം കയ്യിലാകുന്നു. ബഹുഭൂരിപക്ഷവും നരകയാതന അനുഭവിക്കുന്നു. തൊഴിലില്ലായ്മ സര്വ്വവ്യാപകമായി. ഇതൊക്കെ പരിഹരിക്കാനാണ് പ്രധാനമന്ത്രി നരേന്ദ്ര മോദി പരിശ്രമിക്കുന്നത്. സോഷ്യലിസം പ്രസംഗിക്കുകയും മുതലാളിമാരെ വളര്ത്തുകയും ചെയ്യുന്നവരാണ് കമ്മ്യൂണിസ്റ്റുകള്. ലോകമെങ്ങും കമ്മ്യൂണിസ്റ്റുകള് ഭരിക്കുമെന്നായിരുന്നു ഇക്കൂട്ടര് ഒരിക്കല് വീമ്പിളക്കിയിരുന്നത്. നെഹ്റു കഴിഞ്ഞാല് നമ്പൂതിരിപ്പാട് എന്നതായിരുന്നു ഇവരുടെ മുദ്രാവാക്യം. കമ്മ്യൂണിസമല്ല, രാമരാജ്യമെന്ന് സാധാരണക്കാരും ധര്മ്മരാജ്യമെന്ന് പണ്ഡിതരും വിശേഷിപ്പിക്കുന്ന വ്യവസ്ഥിതിയാണ് രാജ്യത്തിന് ഇന്നാവശ്യം. സെക്യൂലര്, സോഷ്യലിസ്റ്റ് എന്ന വാക്കുകള് ഇന്ദിരാഗാന്ധി ഏകപക്ഷീയമായി ഭരണഘടനയില് എഴുതി ചേര്ത്തതാണ്. ഗാന്ധിജിയുടെ നയങ്ങള് ആയിരുന്നില്ല നെഹ്റു ഇഷ്ടപ്പെട്ടത്. കമ്യൂണിസം, സോഷ്യലിസം തുടങ്ങിയ വൈദേശിക ചിന്തയ്ക്ക് പിന്നാലെ പോകുന്നത് ശരിയല്ല. ഭാരതത്തിന്റെ വ്യക്തിത്വം അനുസരിച്ചുള്ള രാഷ്ട്രീയ വ്യവസ്ഥിതിയല്ല നെഹ്റു ഇന്ത്യക്ക് സംഭാവന ചെയ്തത്. ഭാരതീയവും പാശ്ചാത്യവുമായ ചിന്തകളെ കുറിച്ച് പഠിച്ചശേഷമാണ് ദീനദയാല് ഉപാധ്യായ ഏകാത്മ മാനവദര്ശനത്തിന് രൂപം നല്കിയതെന്ന് രാജഗോപാല് പറഞ്ഞു. ഇത് തിരിച്ചറിയാന് നിഷേധാത്മക രാഷ്ട്രീയം ഒഴിവാക്കണം.
അഡ്വ. പി. ജെ തോമസ് അധ്യക്ഷത വഹിച്ചു. ദീനദയാല് റിസര്ച്ച് ഇന്സ്റ്റിറ്റ്യൂട്ട് ഓണററി സെക്രട്ടറി അഭയ് മഹാജന്, സീനിയര് അംഗം വസന്ത് പണ്ഡിറ്റ്, ദീപേന്ദ്രശര്മ്മ എന്നിവര് പ്രഭാഷണം നടത്തി. കെഐബിഎഫ് സെക്രട്ടറി ജോബി ബാലകൃഷ്ണന് സ്വാഗതവും കണ്വീനര് ടി.കെ പ്രഭുല്ലചന്ദ്രന് നന്ദിയും പറഞ്ഞു. വൈകിട്ട് നടന്ന ഭാവാത്മക സ്ത്രീത്വം എന്ന സെമിനാറില് ഡോ. കൊച്ചുറാണി ജോസഫ്, ഡോ. ലക്ഷ്മി ശങ്കര്, അഡ്വ. ടി.പി സിന്ധുമോള്, സി.വി സജിനി അഡ്വ.ജി. മഹേശ്വരി എന്നിവര് സംബന്ധിച്ചു.
