നാഗ്പൂര്: ഇന്ത്യന് ഓഫ് സ്പിന്നര് രവിചന്ദ്ര അശ്വിന് ടെസ്റ്റ് ക്രിക്കറ്റില് പുതിയൊരു അധ്യായം എഴുതിച്ചേര്ത്തു. ടെസ്റ്റ് ക്രിക്കറ്റില് ഏറ്റവും വേഗത്തില് 300 വിക്കറ്റുകള് എന്ന റെക്കോഡാണ് അശ്വിന് ഇന്നലെ സ്വന്തമാക്കിയത്. ശ്രീലങ്കക്കെതിരായ രണ്ടാം ടെസ്റ്റിന്റെ രണ്ടാം ഇന്നിങ്സില് അവസാന വിക്കറ്റ് വീഴ്ത്തിയാണ് അശ്വിന് ഈ റെക്കോര്ഡ് സ്വന്തം പേരിലാക്കിയത്. ലഹിരു ഗമഗെയാണ് അശ്വിന്റെ 300-ാമത് ഇര.
കരിയറിലെ 54-ാം ടെസ്റ്റിലാണ് അശ്വിന് 300 വിക്കറ്റ് തികച്ചത്. 56 മത്സരങ്ങളില് 300 വിക്കറ്റ് നേടിയിരുന്ന ഓസ്ട്രേലിയന് പേസ് ഇതിഹാസം ഡെന്നിസ് ലില്ലിയെയാണ് അശ്വിന് പിന്നിലാക്കിയത്. 58 മത്സരങ്ങളില് 300 വിക്കറ്റ് തികച്ച ലങ്കന് മുന് സ്പിന്നര് മുത്തയ്യ മുരളീധരനാണ് വേഗക്കാരില് മൂന്നാമന്. 61 മത്സരങ്ങളില് 300 വിക്കറ്റ് കൊയ്ത മൂന്ന് പേസര്മാരാണ് പിന്നീട് പട്ടിയില് വരുന്നത്. റിച്ചാര്ഡ് ഹാഡ്ലി (ന്യൂസിലന്ഡ്), മാല്ക്കം മാര്ഷല് (വെസ്റ്റിന്ഡീസ്), ഡെയില് സ്റ്റെയിന് (ദക്ഷിണാഫ്രിക്ക).
ടെസ്റ്റ് ക്രിക്കറ്റില് ഏറ്റവും വേഗത്തില് 200 വിക്കറ്റ് നേട്ടം കൈവരിക്കുന്ന ഇന്ത്യക്കാരനെന്ന റെക്കോഡ് 2016 സെപതംബറില് കാണ്പുരില് സ്വന്തമാക്കിയ അശ്വിന്, ഒരു വര്ഷത്തിനിപ്പുറം നാഗ്പൂരില് 300 വിക്കറ്റ് ക്ലബ്ബിലേക്കെത്തിയപ്പോള് അതിവേഗം ഈ നേട്ടത്തിലെത്തുന്ന ലോകത്തിലെ തന്നെ ഒന്നാമനായി. 300 വിക്കറ്റ് നേട്ടം കൈവരിക്കുന്ന എട്ടാമത്തെ മാത്രം സ്പിന് ബൗളറാണ് അശ്വിന്. ഇന്ത്യന് താരങ്ങളില് അശ്വിന് മുന്നിലുള്ളത് അനില് കുംബ്ലെ, ഹര്ഭജന് സിങ് എന്നിവരാണ്.
ഏറ്റവും കുറഞ്ഞ പന്തുകള് എറിഞ്ഞ് ഈ നേട്ടം സ്വന്തമാക്കിയ സ്പിന്നറും അശ്വിനാണ്. 300 വിക്കറ്റ് സ്വന്തമാക്കാനായി അശ്വിന് എറിഞ്ഞത് 15,636 പന്തുകള്. 18,501 പന്തുകളെറിഞ്ഞ് 300 വിക്കറ്റ് ക്ലബ്ബിലെത്തിയ ഓസീസ് താരം ഷെയ്ന് വോണിന്റെ റെക്കോഡാണ് അശ്വിന് ഇക്കാര്യത്തില് പഴങ്കഥയാക്കിയത്. ഇന്ത്യക്കാരില് 19,876 പന്തുകളില് ഈ നേട്ടം പിന്നിട്ട ഹര്ഭജന് സിങ്ങും അശ്വിനു പിന്നിലായി.
