മണ്ണാര്‍ക്കാട്: ശിരുവാണി എസ് വളവ് മുണ്ടനാട് മലവാരത്തില്‍ ചാര്‍ളിപ്പുഴ ഭാഗത്ത് നിന്ന് മലയണ്ണാനെ വെടിവെച്ചതില്‍ ഒരാള്‍ പിടിയില്‍.
രണ്ടു പേര്‍ ഒളിവില്‍. ചീനിക്കപ്പാറ ദേവസം തൊട്ടയില്‍ വീട്ടില്‍ ജോസഫ് എന്ന സജി (46) ആണ് പിടിയിലായത്. ഡെപ്യൂട്ടി റൈഞ്ചര്‍ സി.വി.വിനോദ്കുമാറും സംഘവുമാണ് പ്രതിയെ പിടികൂടിയത്. പ്രതിയുടെ പക്കല്‍ നിന്ന് ലൈസന്‍സില്ലാത്ത തിരത്തോക്കും കണ്ടെടുത്തു. റൈഞ്ച് ഓഫീസര്‍ മുജീബ് റഹ്മാന് ലഭിച്ച രഹസ്യവിവരത്തെ തുടര്‍ന്ന് ഫോറസ്റ്റുകാര്‍ വനത്തിനുള്ളില്‍ പരിശോധന നടത്തിയപ്പോഴാണ് മലയണ്ണാനെ വെടിവെച്ചത് കാണപ്പെട്ടത്.
വംശനാശം സംഭവിച്ചുകൊണ്ടിരിക്കുന്ന ഷെഡ്യൂള്‍ 1-ല്‍പ്പെട്ട ആണ്‍മലയണ്ണാനെയാണ് പ്രതി വെടിവെച്ച് കൊന്നത്. രാത്രികാലങ്ങളില്‍ വേട്ട സംഘം എത്തുന്ന വിവരം ലഭിച്ചതിനെത്തുടര്‍ന്ന് ഈ ഭാഗത്ത് ഫോറസ്റ്റുകാര്‍ പരിശോധന ശക്തമാക്കിയിരുന്നു. മാപ്പിളകുന്നില്‍ ചാര്‍ളി വീട്ടില്‍ ജോസ് (46), വെട്ടിക്കുഴി വീട്ടില്‍ കുഞ്ഞുമോന്‍ എന്ന ചെറിയാന്‍ (45) എന്നിവരാണ് ഒളിവില്‍ പോയ പ്രതികള്‍. ഇവര്‍ക്കായുള്ള തിരച്ചില്‍ ഊര്‍ജ്ജിതമാക്കിയതായി ഡെപ്യൂട്ടി റൈഞ്ച് ഓഫീസര്‍ സി.വി.വിനോദ്കുമാര്‍ പറഞ്ഞു. പ്രതിയെ കോടതിയില്‍ ഹാജരാക്കി.
പ്രതികരിക്കാൻ ഇവിടെ എഴുതുക: